Seksjonssjef Karoline Bragstad i Folkehelseinstituttet.
NPK
Ekspertar fryktar influensasesongen i år – virus har mutert fleire gonger
Det var i sommar det skjedde noko svært uvanleg. Ein variant av influensaviruset muterte seg heile sju gonger,
skriv TV 2.
– Vi har ikkje sett eit virus som dette på ei stund. Denne dynamikken er uvanleg, seier professor Nicola Lewis, direktør for World Influenza Centre i London, til den britiske kringkastaren BBC.
Det muterte viruset ser ut til å kunne omgå noko av immunforsvaret vårt, skriv BBC.
I Noreg er det størst spreiing av nettopp virustypen H3N2, skriv FHI i sin ferskaste statusrapport om covid-19, influensa og andre luftvegsinfeksjonar. Det er nettopp denne influensavarianten som har mutert seg.
– Den var tidleg sett i Noreg, og vi er eit av dei landa som har høg førekomst, seier seksjonssjef Karoline Bragstad i Folkehelseinstituttet til TV 2.
Det er ein aukande trend i førekomsten av influensa, nokre veker tidlegare enn normalt. Det er mogleg at influensautbrotet i år vil begynne tidlegare enn vanleg. Eldre og risikogrupper bør verne seg ved å ta influensavaksine så snart som mogleg.
– Det hastar med å få vaksinert dei som har høgast risiko for å bli alvorleg sjuke. Vi har litt kortare tid på oss i år på grunn av dette viruset for å rekke å vaksinere før det er for mykje smitte i omlaup, seier Bragstad til TV 2.
