Etterlengta tankbil på plass

– Dette har me ønska oss lenge. Endeleg. Nå kan me rykka ut og ha med oss store mengder vatn. Det gjer hyttefelt og andre område med lite tilgang på vatn mindre sårbare, seier brannsjef Inge Seim.

Ombygd mjølkebil

Onsdag denne veka kom endeleg den nye, spesialbestilte tankbilen til Sauda kommune. Doningen, som er ein tidlegare mjølkebil, er ombygd av firmaet Liftco på Greåker, etter spesialmål og -ønsker frå Sauda brannvesen.

Den nye tankbilen er ein Volvo FH 6×2, 2015-modell og har ein tank på heile 12 000 liter. Dette er 10 000 liter meir enn det ”hovudbrannbilen” som brannvesenet har frå før har plass til. Bilen er sjølvsagt utstyrt med blålys og sirener og har ein motor på 550 hestekrefter.

Må rydda plass

Inne i førarhuset er det plass til fire personar. Tankbilen har kosta 1,3 millionar kroner.

– Me er veldig glade for at politikarane løyva pengar til ny tankbil. Pengane blei lagt inn i budsjettet for 2019. Men grunna spesialmål og ombygging har det tatt litt tid å få den ferdig, forklarer Inge Seim.

– Me er veldig glade for at politikarane løyva pengar til ny tankbil.

For å få plass til den nye tankbilen må det ryddast plass i brannbil-garasjen.

– Det betyr at det eldste kjøretøyet vår, skogsbrannbilen som er av merket Mercedes Unimog 1978/79-modell, må vika plass. Den flyttar me over til dei tidlegare lokala til Sivilforsvaret, som ligg like ved brannstasjonen. Den gamle skogsbrannbilen er framleis i bruk og veldig god, forklarer Seim.

Førarrett klasse C

For å kjøra den nye 26 tonn tunge tankbilen må ein ha førarkort for lastebil, klasse C.

Av Sauda brannvesen sitt mannskap på 26 personar, er det 16 som har denne førarretten. I tillegg er det to personar som er i ferd med å skaffa seg det. Stein Erik Gulbrandsen og Odd Egil Tveit har begge lov til å kjøra den nye tankbilen.

– Har ein lastebil-førarkort skal det gå greitt å kjøra denne tankbilen. Men alle skal ha ei ekstra opplæring saman med brannkonstabel-kollega Andre Håheimsnes, som er lærar ved yrkessjåførlinja, seier Tveit, som har vore i brannvesenet sidan 1998.

Også Gulbrandsen har fått lang fartstid i brannvesenet. Han blei med i 2003.

– Denne tankbilen er ei veldig kjærkommen investering for oss. Dette sikrar oss god tilgang på vatn. I tillegg har denne tankbilen vinsj bak. Det lettar arbeidet i mange situasjonar, seier Gulbrandsen.

Den nye tankbilen har ikkje firehjulstrekk, men har seks hjul og fleire kjetting-løysingar ein kan bruka på glatt vinterføre.

Sauda brannvesen har også det siste året blitt oppgradert med ei stor tunnelvifte. Denne blei kjøpt inn i fjor haust. Tunnelvifta kosta rundt 600 000 kroner, og blei blant anna delfinansiert av midlar frå Saudefaldene, som har ei rekke tunnelar i sitt vasskraftsystem i Saudafjella

Stein Erik Gulbrandsen og Odd Egil Tveit er blant dei 16 brannkonstablane som har lastebilsertifikat og kan dermed kjøra den nye tankbilen. Foto: Ingvil Bakka.