Kvar femte nordmann ber om fred i verda

– Å be er noko alle kan gjere, med eller utan ord, om ein trur eller ikkje. Gud høyrer alle bønner, legg biskopen til.

Verda er ustabil, og mange er redde for at krigen skal ramme oss her heime også. I fastetida før påske har det vore bede om fred i mange gudstenester, og mange deltakarar set pris på å be og tenne lys i kyrkjene våre, heiter det i ei pressemelding frå Den norske kyrkja.

Ei undersøking gjort av Opinion på vegner av Den norske kyrkja, viser at 22 prosent av innbyggjarane her i landet, eller meir enn 1,2 millionar menneske i alle aldersgrupper, har bede til høgare makter om fred.

– At så mange nordmenn ber om fed er eit sterkt uttrykk for at vi kjenner på frykt og uro. Det er djupt menneskeleg å be til høgare makter, og slik uttrykkje det tanken og hjartet er fylt av. Vi an også be for kvarandre. Bønn er den djupast form for solidaritet mellom oss menneske, og det kan få oss til å gjere meir for kvarandre, seier Olav Fykse-Tveit.

Undersøkinga viser at det er flest kvinner som ber, og aller best kvinner mellom 50 og 60 år. Samstundes har 15 prosent av dei unge bede om fred. Geografisk er det fleire som ber i Midt-Noreg og Sørlandet enn resten av landet.

Det kjem også fram at dei som har minst å rutte med, er dei som ber mest. For personar med under 400.000 kroner i inntekt i husstanden er det 35 prosent som svarar at dei har bede om fred i verda den siste tida.