Bodskapen frå norske politikarar har igjen og igjen vore at Noreg må hamna innanfor og ikkje utanfor eventuelle tollmurar.
Men innsatsen ser ut til å ha vore til lita nytte, får NTB opplyst.
Noreg = tredjeland
I april drog statsminister Jonas Gahr Støre (Ap) sjølv til Brussel for å diskutera saka med EU-kommisjonens president Ursula von der Leyen.
Noregs prinsipielle haldning er at me er ein del av EUs indre marknad gjennom EØS-avtalen og difor må få fritak frå handelshindrande tiltak.
Men EU er av ei anna meining. Der blir regelboka til Verdshandelsorganisasjonen (WTO) følgd til punkt og prikka, og ifølgje den skal alle tredjeland omfattast dersom det blir innført såkalla vernetiltak.
I denne samanhengen blir Noreg rekna som eit tredjeland.
Kan ramma eit tital bedrifter
Fredag førre veke tromma Utanriksdepartementet saman LO, NHO, Norsk Industri og ramma bedrifter til eit møte om saka. Også der var bodskapen at det mest sannsynleg blir innført vernetiltak på ferrolegeringar, som blir brukte av stålindustrien, skriv Aftenposten.
Eit titals bedrifter som til saman sysselset rundt 2000 personar, kan bli ramma av tiltaka.
Tiltaka som no blir diskuterte i EU, kan vera kan vera generelle tollmurar, kvotar eller innføring av minstepris. For sistnemnde må det betalast toll dersom den norske salsprisen er lågare enn minsteprisen.
Ei endeleg avgjerd må takast innan 19. november.
Verna eigen industri
Hensikta bak tiltaka er å verna EU-landa sin eigen stålindustri, som slit på grunn av stor global overkapasitet i stålproduksjonen.
At USA og Donald Trump har innført høge tollmurar på stål, har berre forsterka frykta for at den europeiske marknaden skal bli overflødd av billig stål frå andre delar av verda.
Noreg er ein storprodusent av ferrolegeringar, som er legeringar (blandingar) av jarn med andre metall eller halvmetall, som til dømes silisium, mangan eller krom. Desse blir det brukt av stålindustrien for å gjera stål hardare.
Dermed kan Noreg bli særleg ramma av ein eventuell tollmur frå EU.
