Etterspurnaden etter lån hos bankane auka litt i tredje kvartal.
Beate Oma Dahle
Norges Bank: Stor auke i fastrentelån hos bankane
– Etterspurnaden etter fastrentelån auka mykje og meir enn venta, skriv Noregs Bank i
utlånsundersøkinga for tredje kvartal.
Auken kjem etter at fleire bankar i midten av september sette ned rentene på fastrentelån. Bakgrunnen var ein reduksjon i marknadsrentene.
Veka etter sette likevel mange av bankane fastrentene opp igjen, etter at marknadsrentene auka igjen.
– Bankane forventar om lag inga endring i etterspurnaden etter fastrentelån i fjerde kvartal, og dei ventar heller inga endring i samla etterspurnad etter bustadlån i fjerde kvartal, skriv Noregs Bank.
Bankane rapporterer også om ein liten nedgang i utlånsmarginane på bustadlån, og litt auka konkurranse om bustadlånskundane.
Bruken av avdragsfritak overfor hushalda var om lag uendra i tredje kvartal, og bankane ventar inga endring i fjerde kvartal.
