Ny omikronvariant toler antistoff betre

Antistoff i blodet frå vaksine eller gjennomgått covid-19 vernar vanlegvis godt mot ny smitte, men no har ein ny mutert variant av omikron byrja å breie seg, skriv Forskning.no.

Varianten er langt meir motstandsdyktig mot antistoff, har svenske forskarar ved Karolinska Institutet funne ut. Antistoff er berre ein seksdel så effektive mot den nye undervarianten, samanlikna med den vanlegaste omikronvarianten, ifølgje forskarane.

Varianten vart oppdaga tidlegare i haust og har spreidd seg til fleire land, men er framleis i mindretal av registrerte tilfelle. Den er berre ein av fleire nye variantar av liknande mutasjonar av viruset, som vil dominere i nær framtid.

– Det inneber at vi kan forvente oss at talet på infeksjonar kjem til å auke i vinter, seier Ben Murrell ved institutt for mikrobiologi, svulst- og cellebiologi ved Karolinska Institutet i ei pressemelding.

(NPK)