Stolpejakten 2025: 935 personar har vore på Stolpejakt i Sauda

Stolpejakten blei i år arrangert frå og med 1. mai til utgangen av oktober. Arrangørane bak tiltaket er som vanleg idrettslaget Ny Von og Sauda Turlag.

– Me har registrert 935 personar som har deltatt i år. 557 av desse er heimehøyrande i Sauda. Det er elles folk frå totalt 80 norske kommunar som har deltatt på Stolpejakten i Sauda i år, rapporterer Jon Ove Mehus i idrettslaget Ny Von.

Også i vår plasserte arrangøren ut totalt 40 stolpar i Sauda og Saudasjøen.

Runda tusen i 2023

Stolpejakten blei for første gong arrangert i Sauda i 2021, av Ny Von, etter initiativ frå ekteparet Kjellfrid og Jon Ove Mehus. I debutåret deltok 443 personar. I 2022 blei også Sauda Turlag med som arrangør, og jakta blei utvida med 20 stolpar i Saudasjøen – i eit år som fekk 837 personar ut på stolpejakt i Sauda og Saudasjøen. I 2023 deltok heile 1 222 personar i den lokale stolpejakta, medan 907 personar deltok i 2024.

– Så i 2025 har me hatt eit lite oppsving. Det gjer at me kjører på vidare. Det blir Stolpejakten i Sauda og Saudasjøen også i 2026, forsikrar Mehus.

Populære rundturar

Blant dei 935 personane som har registrert seg på Stolpejakten i Sauda i år, er det cirka ti prosent av desse som har tatt alle 40 stolpane. Ifølge Mehus verkar det å vera flest damer blant deltakarane.

– Blant dei som har registrert seg med kjønn, så finn me 398 kvinner og 222 menn. Men det er altså mange som ikkje oppgir kjønn, forklarer han.

Årets Stolpejakten i Sauda og Saudasjøen baud på mange varierte turar, som vanleg med ulike vanskegrad. I år var det lagt opp til fleire rundturar, der ein kunne ta fleire stolpar på ein og same tur.

– Det har me inntrykk av at folk liker, og folk har etterlyst fleire slike rundturar. Det skal me få til neste år, seier Mehus.

I år var det fire såkalla svarte stolpar». Den mest krevande, Flatskårnuten, har totalt 157 registreringar.

– På opningsdagen, 1. mai, hadde me eit lokketilbod, der alle som registrerte seg i Stolpejakten her i Sauda var med i trekking av pizzaer. Det enda med 126 registreringar den dagen, det var litt artig, smiler Mehus.

Trekkepremiar

Formålet med Stolpejakten er å få folk opp av godstolen og ut på tur, gjerne til nye og spennande turmål. Mehus fortel om bare positive tilbakemeldingar frå folk, som tydeleg set pris på dette aktivitetstilbodet.

– Så her blir det ikkje kåra vinnarar. Her konkurrerer alle med seg sjølve. Men me synest det er kjekt å kunna belønna deltakarane, og gjer då ei uttrekking av premiar. Då trekker me fire premiar blant dei som har tatt alle 40 stolpane, tre premiar blant dei ti som har flest registreringar, og tre premiar blant dei som har tatt 20 eller fleire stolpar, forklarer Mehus.

Nå startar planlegginga av Stolpejakten 2026.

– Som sagt vil me legga opp til fleire rundturar, og me vil legga lista litt lågare når det gjeld dei mest krevande turane. Sauda Seven Summits får ta seg av nut-turane, så tilbyr me turar litt lenger nede i låglandet, forklarer Jon Ove Mehus.