Tråkkemaskina flytta før andre runde av Telenorkarusellen i hopp

Tråkkemaskina treng fortsatt nokre utbetringar før den kan tas i normal drift, men hoppanlegget er nå igjen klart til fullt bruk. Dermed kunne bakkemannskapa ved hjelp av snøskuter og ski starta på jobben med å få bakkane klargjort til andre runde av Telenorkarusellen. Bakkane var flott preparert alt måndag kveld og klare til tysdagens karusell, men i løpet av tysdag formiddag lava det ned store mengder nysnø, dette førte til at karusellen måtte utsettast i nærare 40 minutt medan bakkemannskapa ferdigstilte prepareringa av alle bakkane på nytt.

Under prepareringsjobben opplevde underteikna å bli sittande fast på kulspissen på tur ned bakken for å hente noko utstyr, dette grunna kraftig klabb frå våt nysnø.

Spenninga var derfor stor til korleis dette ville slå ut på fart og eventuell lugging i landinga når hopprennet endeleg kom i gang.

Det viste seg fort at hopparane stilte med mykje betre preparerte ski enn bakkemannskapa. Lugging blei derfor ikkje noko problem, men lett snødriv i første omgang førte til noko redusert fart for dei fleste, dermed blei det ikkje notert nokre store hopplengder denne kvelden.

Grunna mykje ekstraarbeid med preparering, så var det fleire av dei yngste som valde å stille i K-10-bakken for første gong, dermed spara dei bakkemannskapa for arbeid med preparering av K-5-bakken.

Alle dei yngste hopparane der fleire av dei også er heilt ferske innan hoppsporten imponerte publikum med strålande hopping. Nokre sette også personlege rekordar og jubla høgt til underhalding og begeistring for publikum.

Snøvêret ga seg i andre omgang og fleire av hopparane la derfor på ein halvmeter og nokre også fleire meter. Lengste hopp i K-20 blei 16.5 meter av Tristan Olsen Seltveit. Dei to lengste i K-10 vart Sigurd Røssland Garstad og Runar Ness som begge hoppa 6.5 meter.

Totalt var det elleve deltakarar med på karusellen: Ti gutar og ei jente. Me håpar at også fleire jenter vel å gjera slik som Vårin Lau Bryne; ta med seg slalåmski eller låne gratis hoppski i bakken og melde seg på neste karusellrenn.

Kvelden blei som vanleg avslutta med kaker og saft i klubbhuset.

Referent Halvor Seltveit

Resultatliste 2. runde av Telenorkarusellen i hopp: