Draumen om ei kvit jul vert sjeldnare oppfylt i dag enn for 30 år sidan, viser målingane til Meteorologisk institutt. Klimaendringane dei siste 30 åra er tydelege og gjer seg gjeldande i alle fylke.
Heiko Junge / NTB / NPK
Tydelege klimaendringar i alle fylke – sjeldnare kvit jul
Det konstaterer Meteorologisk institutt i ei pressemelding der dei viser til store klimaendringar gjennom dei siste 30 åra. Endringane kan merkast i heile landet.
Sjansen for kvit jul har minska dei fleste stader i landet. Aller størst er endringa i Flekkefjord i Agder. Medan det var 70 prosent sjanse for kvit jul i perioden 1961-1990, har han minka med 33 prosent dei siste 30 åra.
Vintrane er også kortare. I Rogaland har skisesongen vorte fjorten dagar kortare. Det viser målingar frå Gullingen skisenter i Suldal, som ligg 600 meter over havet. I Sokna i Viken har 36 skidagar vorte borte dei siste 30 åra.
Vintertemperaturane i Norge har i snitt auka med rundt 2 grader, og sommartemperaturar om vinteren vert vanlegare. Det var over 15 grader om vinteren (desember, januar, februar) 18 gonger i Tafjord i Møre og Romsdal mellom 1961–2020. Mellom 1991–2020 kom temperaturen over 15 grader heile 34 gonger.
I Bergen er det nær tre gonger så mange høgsommardagar (over 25 grader) som for 30 år sidan. Det vil seie 9 dagar mot 3,2 for 30 år sidan. Sommardagar med over 20 grader har auke frå 24 til 42 i same periode.
(NPK)
