Veka som gjekk (utanfor Sandeid)

Med glasaktig blikk begynte eg å akseptere at alt skulle komme til å bli annleis enn eg hadde tenkt. Tenk å få denne beskjeden tidleg i tredveåra. Tenk å få påvist lumbago. Eg var jo endå ung. Kvifor akkurat meg? Det var akkurat idet dei mørkaste tankane begynte å sette inn, at eg måtte spørre dokteren. Kva er eigentleg lumbago?

”Uspesifiserte smerter i korsryggen”, var svaret eg fekk. Her hadde eg vore gjennom både blodprøvar, MR-bilder, røntgen, kiropraktor-tortur, helvetesveke på ryggklinikk og det som verre er, bare for å få tildelt ein diagnose som eg sjølv kunne stilt, heilt gratis. Eg visste jo for pokker at eg hadde vondt i korsryggen!

Nå er det nærare ti år sidan eg fekk den verdilause beskjeden, og lite har forandra seg. Eg gruar meg framleis til å ta på sko. Eg kan framleis ikkje sette meg ned i verken stol eller sofa utan å klynke eller stønne. Det er blitt rutine. Pussig nok går det stort sett greitt å spele fotball, så lenge eg slepp å bøye meg for å plukke opp ballen. Eg må halde sparkinga til venstrefoten, for høgrekneet har også fått ”lumbago”.

I den store verda har det skjedd mykje denne veka, og her er nokre av sakane eg stoppa opp ved:

• Kunstnaren Veslemøy Lilleengen lagar blåfarga kunst av kvinners urin. Ho har samla omlag 150 liter av ”råvara” og seier til NRK at ho er irritert over at mange trur at mannleg urin lagar finare blåfarge. Ho reagerer også med sinne over at ni av ti offentlege kunstverk er laga av menn. Eg er ingen kunstekspert, men kan det ha noko å gjere med at dei bruker maling?
• Nettstaden seher.no kjem denne veka med oppsiktsvekkande nyheiter om programleiar Silje Nordnes, nemlig at ho ikkje er forelska. Eg forventar ei ekstra nyheitssending om saka.
• Donald Trump har nytta sine siste timar som president til å benåde 73 dømte personar i heimlandet. Det er, ikkje overraskande, støttespelarar av han sjølv som utgjer brorparten av desse. Blant personane Trump har benåda, er rapparen Lil Wayne, svindlaren Steve Bannon og den tidligare forretningsmannen Sholam Weiss, som soner ei straff på 835 år i fengsel for mellom anna kvitvasking og bedrageri. Samstundes har Trump den siste tida diskutert ei etablering av eit nytt parti i USA, som han vil kalle ”Patriotpartiet”. Han får nok ein god start i partiet sitt, Donald Trump, med 73 ivrige nye medlemmer. Det blir ein bra gjeng.
• Fotballspelaren John Arne Riise er ute av realityprogrammet Farmen. Han får dermed masse tid til å øve på den nye Oslo-dialekta si.
• Dagbladet har denne veka kåra Norges 25 viktigaste politikarar gjennom tidene. Ikkje uventa er både Einar Gerhardsen, Gro Harlem Brundtland og Erna Solberg på lista. Donald Trump seier i en kommentar at han sjølv burde ha vore nummer éin også i denne kåringa. ”Ingen kjenner Sverige som eg gjer”, legg han til.