Veka som gjekk (utanfor Sandeid)

La meg ta eit eksempel. ”No gler eg meg til våren, for då må vi vaske og male huset.” Kvar for seg, og delt opp, er bodskapa i denne setninga logisk. Mange gler seg til våren, og mange må vaske og male huset. Likevel blir ikkje desse to elementa i setninga logiske når dei blir sett saman.

”Eg fekk plutseleg lyst på fullkornspasta”. Denne setninga kan rett nok ha blitt uttalt eit fåtal gonger, men då har det vore på fleip. Det same gjeld setninga ”Skal vi droppe fårikål denne hausten?” Nokre setningar er kjønnsbetinga. ”Kan eg ta den siste After Eight-en i kjøleskapet?” Ein mann ville aldri sagt dette. Han ville tatt, ete stille, og håpa at ingen stilte spørsmål. På same måte ville ikkje ei mann ha sagt setninga ”Britisk kostymedrama, ja, kvifor ikkje?”

I sosiale mediar gjeld mange uskrivne reglar for kva ein kan, og kva ein ikkje kan seie til sine facebook-venar. Ingen skriv ”Då er eg ferdig med nok ein drit kjedeleg joggetur, og no har eg vondt.” Eg har heller ikkje sett nokon skrive ”Dette er katten min. Han er strengt tatt som alle andre kattar.”

Barn har ikkje slike filter, og kan vere forfriskande å lytte til, i sine ærlege framstillingar av verkelegheita slik dei ser ho. Som då gutungen min hadde teikna Jesus på korset førre påske, og fekk klassekompisen til å beskrive verket med sine eigne ord. Dermed blei tittelen på teikninga som følger: ”Gud på kristendomsstanga”.

Her er eit par saker eg la merke til ute i verda denne veka:

* Avisa Hordaland Folkeblad har denne veka følgande overskrift på trykk: ”Færre kattar på ferie i fjor”. Eg forstår ikkje heilt kva som er nyheitspoenget her, for kattar er vel ikkje unntatt reiserestriksjonane?

* Politiet i Bergen stoppa denne veka ein fest der to-metersregelen ikkje blei overhaldt. Fleire av festdeltakarane var sterkt ueinige i den avgjerda, men eg tenker at politiet har ein relativt vatntett sak, då det var 50 personar i leilegheita på 50 kvadratmeter. Det er neppe formildande at dei fleste heller ikkje var hundre prosent tilstade.

* Den kanadiske brytaren Khetag Pliev fekk ein finger riven tvers av i ein kamp i den obskure ”sporten” Cage Fury Fighting. Pliev fann ikkje fingeren før han tok hanskane av, då domaren stoppa kampen. Brytaren sjølv var først og fremst sur for at han ikkje fekk sloss vidare utan fingeren, så det spørs om ikkje hovudet også burde sjekkast grundig.

* Kaninen Darius forsvann denne veka frå hagen til eigaren sin, engelske Annette Edwards. Darius blei i 2010 premiert i Guinness rekordbok som verdas største kanin. Han målar ikkje mindre enn 129 centimeter frå snute til hale, så det er etter alt å døme trygt å avskrive både tryllekunstnarar og nabopuddelen Dolly som mistenkte i saka.