Veka som gjekk (utanfor Sandeid)

Når eg no fyller 42 år om nokre dagar, er det heilt andre ting som gir meg høg puls og kaldsvette. Ein av desse tinga er ein kombinasjon av tre ord, som åleine får meg til å kjenne meg kald, åleine og sårbar. Dei tre orda er ”Brukarnamn og passord”.

Orda kan i seg sjølv verke harmlause, og mange trur nok at desse tre orda er som alle andre ord. Det er dei ikkje. Det fins nemleg usynlege krefter i universet, onde krefter, som livnærar seg på mine fortvilte rop, bøner, gråt, forbanningar og samanbrot i møte med dei tre orda. Dei får fram ei mørk side av meg som eg ikkje er herre over, ei side som skremmer meg sjølv.

I dag møter ein desse fandens tre mellomnamn overalt, og eg begriper ikkje kvifor ikkje fleire skriker høgt ut om denne styggedomen. Eg mistenker at det er store mørketal. Kvar dag er det gode, skattebetalande familiefolk som får slengt mot seg ukvemsord som ”Brukarnamn eller passord er feil”, ”Passordet må innehalde minst eitt teikn, stor bokstav og /eller tal” eller ”Brukarnamnet og/eller passordet er allereie i bruk”. Det er ondskap i si reinaste form.

Her er eit par nyheiter eg har notert meg frå veka som gjekk, og dei skal du få lese utan pålogging av noko slag.

* For ei veke sidan skreiv norske mediar om dei umenneskelege forholda deltakarane i ”Farmen kjendis” må leve under. Då var det Øyunn Krogh som røpa at både ho og andre deltakarar var blitt tvinga til å gå rundt i klede som ikkje passa saman. Denne veka kjem det fram nye sjokkerande detaljar fram om programmet, når songar og deltakar Tomine Harket fortel si sterke historie frå reality-garden. Den musikalske 28-åringen røper at ho allereie etter nokre timar av opphaldet på garden, blei nøydd til å klippe av sine lange, kunstige neglar. ”Jeg blir en litt ekstra versjon av meg selv med de neglene. Når jeg tar dem av er jeg en helt annen person”, fortel ho til VG i eit kjenslelada intervju måndag. Vi føler med deg, Tomine. Ikkje gi opp!

* Ein mann som hadde vore sakna frå ein landsby i Indonesia, blei denne veka funne inni ei sju meter lang krokodille, melder VG. Å gøyme seg der var neppe særleg gjennomtenkt.

* Mange flyselskap har kutta ut den 13. rada med seter på sine fly, grunna talets dårlege rykte som ulukkestal, skriv Dagbladet denne veka. Eg foreslår at dei også kutter ut rad nummer 2, 4, 6, 8 og alle andre partal, så går det kanskje an å få plass til beina i framtida?

* Dagbladet melder denne veka at artisten Christina Aguilera har kasta kleda nok ein gong. Eg håpar ho fekk hjelp til å plukke dei fort opp att.

* TV2 melder at programmet ”Hver gang vi møtes” har opplevd ein nedgang i sjåartala. Konseptet går ut på at seks etablerte artistar skal tolke kvarandre sin musikk, og framføre denne i koseleg lag med dei andre artistane, mens dei gret om kapp og snakkar om gamle dagar. Eg er usikker på om eg finn det veldig interessant å høyre artistar som TIX og Myra mimre om då dei starta sine musikarliv ein gong i gamle dagar, som i desse tilfella vil vere i 2019.

* Bloggar og ”influensar” Anniken Jørgensen fortalte for to veker sidan at ho trengte ein pause frå sosiale mediar. Den lange ventetida er no over, då ho igjen har tydd til Instagram, denne gong for å fortelle at ho slit med at nettopp Instagram er ein stor stressfaktor i livet. Eg tenker at ho kanskje burde sjå på muligheita for å sikte mot ein enklare og meir stressfri arbeidskvardag, for eksempel som akuttsjukepleiar.