Veka som gjekk (utanfor Sandeid)

Svaret er nei.

Det er nemleg slik at på same tid som eg sit her og skriv, skjer det ting rundt oss som er umuleg å tenke på utan å kjenne på både hjertebank og rykkingar i den dømmande peikefingeren. Det er så mykje eg ikkje forstår. Akkurat no er det for eksempel nokon, i ein eller annan bustad i Sauda, som sit med ei tåre i augekroken mens dei ser den nye ”Sex og singelliv”-filmen.

Akkurat no er det minst éin saudabu som nikkar anerkjennande mens han delar eit Facebook-innlegg frå ein bekjent, som konstaterer kor trist det er at så lite som éin prosent av befolkninga er sjølvstendige og kritiske nok til å forstå at vaksiner mot koronasmitte er eit verktøy for satanistiske romvesen som ønsker å busette seg på jorda saman med dei onde helsemyndigheitene og politikarane.

Akkurat no er det nokon som gler seg til å jogge.

Akkurat i dette augeblikk, er det minst éin saudabu som er på veg heim frå butikken. Posane med matvarer ligg i bagasjerommet. Dører og vindaug er lukka, og han eller ho sit bak rattet i sin eigen bil. Med munnbindet på.

Nei, eg trur det seier seg sjølv at det framleis er eit par ting som må luftast. Nokre nyheiter har eg også lagt merke til denne veka:

* Sjåarar har reagert og sponsorar har trekt seg, etter at TV2 bestemte seg for å hyre inn den kjente bakmannen frå Nokas-ranet i 2003, David Toska, som gjest i studio under kanalens dekning av Tata Steel-turneringa dei kommande vekene. Kva som har vore TV2 sin idé bak tilsettinga av Toska kan ein berre spekulere i, men noko sjakktrekk var det openbart ikkje.

* Det braut ut full krangel i avisspaltene då bloggar Linnea Myhre kalla TvNorge-programmet ”16 ukers helvete” for det verste programmet ho nokon gong hadde sett. Bloggarens kritikk av slankeprogrammet blei raskt besvart av Christer Falck, som sjølv er deltakar i programmet. ”Et par fingre i halsen på 2000-tallet, og vips så er du ekspert på alle andres matvaner”, kommenterte Falck, og viste med det sin sedvanlege eleganse i møte med andre sine meiningar. Deretter argumenterte Falck seg sjølv langt vekk frå skildringar av å vere ufin og ”harry”. Denne veka blei Falck også pappa igjen, og til VG fortel han at han helst ville kalle barnet for Prince Rogers. Men ”harry”, det er han altså ikkje.

* Freia tilbakekalla denne veka eit parti med Melkerull, etter at det blei oppdaga at partiet kan innehalde bitar av Daim. Om ingen melder seg, så tar eg gjerne ein for laget, og får ”destruert” dette fæle partiet med Melkerull.

* ”Farmen Kjendis”-deltakar Øyunn Krogh fortel at opphaldet på gard var utfordrande med tanke på antrekk. Ho fortel til TV2 at ho etter beste evne prøvde å pakke med seg ein garderobe med plagg som fungerer saman, men at dette blei vanskeleg med dei restriksjonane deltakarane fekk før innspelinga. Eg forstår godt at Krogh reagerer. Å bli frårøva mulegheita til å kle seg moteriktig på garden, er verken menneskeleg eller trygt. Produksjonen må jo forstå at både kyr og hestar blir forvirra når folk virrar rundt dei med fjorårets Cubus-bukser eller strikkagenserar frå Sparkjøp. Her må det ordnast opp.