Veka som gjekk (utanfor Sandeid)

Eg er ein stor tilhengar av likestilling, men skal vi først starte denne kjønnsnøytraliseringa for alvor, trur eg vi vil møte på ein del utfordringar undervegs. Når politiet skal finne seg ny lensperson, kan dei ikkje lenger snakke om bemanning, overbemanning, underbemanning eller bemanningslister. Ikkje kan dei vere førstemann til å ta tak i problemet heller.

Brannmenn, postmenn og alle typar mannskap vil snart vere historie. Det vil også bli slutt på alt-muleg-menn og voldsmenn, men kva skal ungdomen finne på når dei ikkje kan drive med villmannskøyring? Må alle flytte i rekkehus og einebustader, eller vil det framleis eksistere tomannsbustader? Eller tremannstelt?

Det er sjølvsagt heilt ok å slutte med å skremme ungane med bø-mannen, men bygging av snømann vil nok bli eit sakn blant dei små. Og kor skal den alminnelege mannen i gata gjere av seg?

Kva skal dei finne på i Rauma, dei som har venta i årevis på at fjellet Mannen skal rase? Og kva om fjellet faktisk raser? Ikkje kan dei vente på redningsmenn, og ikkje kan dei varsle sidemann eller gå mann av huse for å kome seg unna heller. Nei, det kjem til å bli ei strabasiøs omstilling dette, men det er vel bare å manne seg opp.

Her er ein liten bukett av meir eller mindre uviktige observasjonar frå nyheitsbiletet den siste veka:

* VG kunne denne veka dele ein avslørande video med sine lesarar. Det var ein PostNord-sjåfør som blei filma då han kasta pakkar inn i lastebilen sin, til sjokk og vantru frå ein observant tilskodar. PostNord var raskt ute med både beklaging og lovnader om at dette ikkje er innafor selskapets retningslinjer. Eg reknar med at sjåføren vil få fyken, men han har i alle tilfelle lagt inn ein god søknad for å få seg ny jobb på ein flyplass.

* FrPs påtroppande leiar Sylvi Listhaug fortel denne veka til Dagbladet at ho nyter å lytte til sitat frå den danske Socialdemokratiet-politikaren Mattias Tesfaye, som enkelt forklart vil kaste ut innvandrarar som ikkje lar seg forme av dei danske verdiane. ”Dette er musikk i mine ører. Tenk om vi fikk høre en Arbeiderparti-politiker si noe slikt”, seier Listhaug til avisa. Så redd som denne dama er for nye kulturar, så må ho jammen ha høge gjerde rundt huset sitt, stakkar.

* ”Nå er det vel snart vår”, er den forsiktig optimistiske overskrifta på avisa Finnmarksposten måndag. Avisa er elles pepra av saker om stengte vegar, kolonnekøyring, bergingsaksjonar og avlyste arrangement, grunna uvêr. Mellom nedsnødde bilar og piskande snøfiller og vind, poserer ein finnmarking på eit bilete i avisa med eit modig smil om munnen. ”Alt er jo tross alt ikke avlyst, og det regner heller ikke”, seier han til avisa. Ein kan ikkje anna enn å applaudere ei slik haldning til livet.

* Ein blottar som har drive med slike ting som blottarar driv med, fekk denne veka klar beskjed frå politiet på Lillestrøm. Ein fornærma i saken skal nemleg ha tatt bilete av mannen, som politiet nå truar med å publisere i media, om han ikkje melder seg. Nå er ikkje eg ekspert på verken truslar eller blotting, men vil det ikkje vere den ultimate belønning for ein blottar å bli ”avkledd” i media?