Veka som gjekk (utanfor Sandeid)

Om ein er som meg, og hovudsakeleg les nyheiter på nett, er det nemleg eit par tjuvtriks det kan vere nyttig å vite om. Kjenner du til desse, kan det spare deg for mange unødvendige klikk på artiklar og videoar som er fullstendig uinteressante, og som eksisterer av éin grunn, og éin grunn åleine, nemleg å skape fleire klikk på nettstaden.

Nøkkelen er å tyde overskrifta, for det er her nyansane røper innhaldet. La meg gi eit par eksempel. Overskrifta ”Deler gladnyhet” betyr i 98 prosent av tilfella at personen eller personane på biletet ventar barn. Dette er sjølvsagt såpass uinteressant at avisa ikkje kan røpe det i overskrifta.

Ingen hadde vel klikka seg inn på ein artikkel om overskrifta var ”Synes det hadde passet litt bedre med en svart kjole”. Dette blir for tamt, og i slike tilfelle går avisene som regel for varianten ”Slakter kjolevalget”. Det er mykje og mange som blir ”slakta” i avisene, og dette ordet er meint å sprite opp ein artikkel eller video som du aldri hadde brukt tid på om du kjente innhaldet. Eg har faktisk sett eksempel der kjendisar ”slaktar” seg sjølv.

Alle overskrifter som blir starta eller avslutta med ordet ”dette”, kan du også trygt styre unna. Årsaka til at ordet blir brukt, er at ”dette” eigentleg er uinteressant. ”Reagerer på dette”, ”Mange glemmer dette”, ”Du gjer vel ikkje dette?”, ”Dette sier ho om kongen si helse” eller ”Plutseleg gjer han dette” er nokre eksempel. Overskriftene ”Vekker oppsikt” og ”Vekker reaksjoner” betyr på ingen måte at nokon har reagert på noko som helst. Dei blir som regel brukt når avisa har kome over ein videosnutt eller eit bilde som andre aviser har publisert før. Du kan også trygt droppe artiklar med overskriftene ”Slik ser han ikke ut lenger”, ”Får sjokk” og ”Bekrefter ryktene”.

Ein av dei beste overskriftene eg nokon gong har lest på nett, fann eg på VG si nettavis under Tour de Ski i 2018. Då medaljevinnaren Tirill Udnes Weng skulle forlate medaljeseremonien, mista ho ein stor, rund ost ho hadde fått i premie ned på snøen. Ho bøya seg ned og plukka den opp igjen. VG sparte ikkje på kruttet, og klinka til med overskrifta ”Skiløperens premie-mareritt”.

Utan å love meir enn eg kan halde, har eg funne eit par tåleleg interessante nyheiter denne veka også:

* Den litle øya Utsira har denne veka fått sine første tilfelle av koronasmitte. Ordføraren fortel til Dagbladet at det dreier seg om eit utbrot. Ho skuldar ikkje utbrotet på nokon, og nemnar ikkje for avisa at det bare er Hallgeir og far hans som har vore i land dei siste to vekene.

* Fotballspelaren Kristoffer Barmen, som fekk sparken i Brann i sommar, er klar for spel for klubben Aalesund. Eg reknar med at det blir feira etter alle kunstens reglar.

* Seks liter sprit, seks liter raudvin og ti sjokoladeplater. Nei, dette er ikkje handlelista frå det siste ”Gutta på tur”-programmet. Det er ”Farmen kjendis”-deltakar Sophie Elise si hemmelege handleliste frå innspelinga som fann stad i fjor sommar. Smuglinga av alkohol og luksusvarer skuffar visstnok TV2, men er det ikkje nettopp smugling, juks, krangling og skandale dette programmet handlar om, eller er det noko eg ikkje har fått med meg?

* Sjaman Durek og kjærasten Märtha Louise røper denne veka sine bryllaupsplanar, som ifølge nettstaden seher.no skal finne stad til våren. Dermed er det duka for ein spektakulær seremoni der både kongefamilien, vener, bekjente, englar og øgler frå både fjerne og nære planetar er inviterte. Det blir stas.

* Regjeringa fjerna tysdag denne veka dei fleste koronarestriksjonane, til stor jubel frå både næringsliv og festglade nordmenn. No kan ein endeleg drikke alkohol så mykje og så lenge ein vil, snøvle, rølpe og sloss. Serveringsstadene er imidlertid pålagt å legge til rette for at gjestane skal kunne gjere dette med ein meters avstand til kvarandre. Regjeringa spesifiserer også at det ikkje skal gjennomførast aktiviteter som naturleg legg opp til mindre avstand mellom folk enn éin meter, som for eksempel dansing. Her trur eg regjeringa overdriv risikoen litt, for dei gongene eg sjølv har dansa, har folk haldt vesentleg meir enn ein meters avstand til meg.