Veka som gjekk (utanfor Sandeid)

Den søte kjensla av laber bris med meir enn to grader, sola som var framme fleire minutt av gangen. Knoppar som titta fram i beda. Det såg så lovande ut, men plutseleg var alt på nytt dekt av eit kvitt slør av vatn i støvform.

Eg var ikkje førebudd. Eg hadde akkurat olja grasklipparen, rydda fram rive og hekksaks og sjekka at langrennskia framleis låg trygt oppunder taket i garasjen. Vintertøyet var pakka vekk, og ei forsiktig glede hadde begynt å bre seg i mitt sinn. No var det våren sin tur, med sine grøne fingrar, milde dagar og kaffikoppar i sola. Trudde eg.

Her i Sauda er det gjerne ikkje lov å seie slikt høgt, men no synest eg at Kong Vinter kan ta seg ein tur på karantenehotell i åtte månaders tid, og la ein vêrsjuk bergensar i eksil få kome i gang med hagearbeidet.

Medan eg har venta på varmare dagar, har eg fått med meg nokre nyheiter ute frå den store verda. Her er eit par av sakene eg la merke til denne veka:

* Smak på denne overskrifta: ”Dette har slankeekspertene i påskeegget”. Når eg svelger unna vreden som umiddelbart melder seg, får eg i denne artikkelen fleire forslag til godsaker ein kan putte i pappegget. Kva med kosthaldsekspert Silje Bjørnstad sine tips, nemleg å byte ut godterier med ein kortstokk, porsjonsposer med suppe, sukkerfri tyggegummi, teposar, tørka frukt, eller kanskje ei personleg helsing? Eg skulle med glede ha invitert Bjørnstad heim til meg og levert sine ”påskeegg” til mine ungar. Då trur eg at ho hadde fått både ei og to ”personlege helsingar” i retur.

* Mens det norske fotballandslaget på sedvanleg vis skuffa, blei det full fyr i Dagbladet-redaksjonen då pappaen og agenten til Erling Braut Haaland blei observert i Barcelona saman med representantar frå det spanske storlaget med same namn. Dagbladet meldte med brask og bram at her skjer det store ting. Ikkje lenge etter kom ein ny artikkel, med bilde av fotballspelaren, og ei endå større overskrift: ”Hundre prosent bekreftet”. Kunne dette være tilfellet? Hadde verkeleg Haaland signert for Barcelona? Nei, det viste seg at det som var hundre prosent bekrefta, var at hendingane avisa hadde skrive om i den første saka, stemte.

* Lesarane av den nordnorske avisa Fremover kunne denne veka få sjå video av ein vill jerv, som koste seg med eit påskeegg han hadde fått av snille naboar. Jerven virka glad og fornøgd, så påskeegget var ikkje fylt med inspirasjon frå Silje Bjørnstad.

* Dagbladet skriv denne veka at helsedirektør Bjørn Guldvog er nervøs og spent på smittetala etter påska, og serverer overskrifta ”Holder pusten etter påska”. Smart smittetiltak, men eg trur det kan bli utfordrande i lengda.

* VG leverte i påska historia om 48-åringen Emma, som tener til livets opphald ved å selge videosnuttar av seg sjølv medan ho fjertar. Den amerikanske tobarnsmora skal etter det VG erfarer tene over fire tusen dollar i månaden på ”bedrifta” si, og det synest eg ho fortener. Det er trass alt godt at nokon tar på seg drittjobbane. Emma er lykkeleg gift, så ein kan vel trygt seie at ho lever godt på luft og kjærleik.