Veka som gjekk (utanfor Sandeid)

For all del. Eg er glad i byen eg vaks opp i, men verken buekorps, Brann, bompengar eller langebrød får fram noko som kan minne om heimlengsel hos meg. Det blir sagt at bergensarar er store i kjeften, og det skal eg ikkje nekte for. Dei treng ikkje å ha noko viktig å seie, for å seie det høgt. Og i Bergen, der lever lokalpatriotismen eit godt liv.

Det er blitt fortalt at ein sjef på bergensbryggeriet Hansa ein gong var på bryggeriseminar, der bransjen samla seg og delte erfaringar og nyvinningar. Det var etter det faglege opplegget, at Hansa-sjefen saman med kollegaer frå Frydenlund og Ringnes bryggerier, gjekk på ein bar for å kople av etter ein lang dag. Frydenlund-sjefen bestilte sjølvsagt Frydenlund pils, medan Ringnes-sjefen bestilte pils frå Ringnes. Dei reagerte begge med vantru då Hansa-sjefen bestilte seg ein Farris, men han svarte kort og greitt tilbake at ”hvis ikkje dokkar skal ha øl, så gidder ikkje eg heller.”

Eg har blitt miljøskada eit halvt liv i Bergen, og no har eg merka at også Sauda er i ferd med å sette sitt preg på meg. Det er ikkje mange dagane sidan eg tok meg sjølv i å spørre ”Åja, då er han kanskje sonen til…? Bur ikkje dei oppe i…?” Eg høyrte det sjølv då eg sa det.

I ein av songane om fotballaget Brann, heiter det ”Sjølv når vi taper, er vi best”. Det er bare bergensarar som kan skrive noko slikt. På same måte er det nok bare ein bergensar som kan tru at hans eigne erfaringar med handlelister, hagestell, feilparkering av handlevogner og køkultur på fly, er underhaldande avisstoff. Men her sit eg no og skriv.

Ute i verda var det i alle fall litt god underhaldning å finne denne veka.

* Märtha Louises kjærast, sjaman Durek Verret, fekk ikkje feira nasjonaldagen i Norge, men nettstaden seher.no melder at han likevel sendte ei helsing til heile landet via Instagram, der han trøysta alle med at han ”likevel var med på feiringa i ånda og i hjartet”. Som sjaman er han ein av veldig få som faktisk er i stand til det.

* Deltakarane i realityprogrammet ”Sommerhytta” fekk i ein konkurranse denne veka i oppgåve å teikne ein aktmodell. Ikkje så spreke saker, men korleis sørger Dagbladet for at mange likevel klikkar seg inn til videoen? Jo, med overskrifta ”Får naken-sjokk”. Tenk det. Både ”naken” og ”sjokk” i same tittel. Sånn skal det gjerast.

* Også denne veka har det skjedd ting i nord. ”Robåt uten mannskap funnet på Hålogalandsbrua”, skriv Avisa Fremover.

* Demi Lovato, som blant anna er kjend for å vere stemmen til Elsa i filmane Frost og Frost 2, delte i mars nyheita at ho ser på seg sjølv som panseksuell, og denne veka har ho også bestemt seg for at ho vil stå fram som ”ikkje-binær”, altså verken som kvinne eller mann. Eg må innrømme at eg ikkje var klar over at dette var ein mulegheit.

* Eit ektepar fekk seg ei solid overrasking då dei skulle grille i hagen sin på Herøy denne veka. Plutselig dundra ein stor fisk ned i epletreet deira, og blei hengande. Dei fleste av oss har vel opplevd å få torsk og sei i epletreet ein gong i blant, men det merkelege med denne historia er at fisken var av arten skolest, som lever på djupner ned til 1000 meter. Ein marinbiolog som er intervjua i saka, meiner at fisken må ha blitt fanga som bifangst i ein reketrål, for så ha blitt kasta på havet, plukka opp av ei ørn, og deretter mista ned i epletreet på Herøy. Eg har aldri høyrt om ein så uheldig djupvassfisk før.