Folksamt på loppemarknad

Det vart folksamt, god drøs og mange gode kjøp då Rebekkaloge 68 Linnea arrangerte loppemarknad laurdag 28. mars. Allereie lenge før dørene opna, vitna den lange køen på utsida om at mange hadde sett av laurdagen til eit besøk på logehuset. Det var tydeleg at forventningane var store, og då startskotet endeleg gjekk, strøymde folk inn for å sikre seg dei beste godbitane. Utvalet av lopper var stort og variert, og det tok ikkje lang tid før dei første skattane fann vegen til nye heimar.

Det er noko eige med å sjå brukte gjenstandar få nytt liv hos andre. Det er ikkje berre god ressursbruk i praksis, men det skaper også ein unik dynamikk når folk går på oppdagingsferd mellom borda. Bak arrangementet ligg eit ønske om å setja verdiar som venskap, nestekjærleik og omtanke ut i livet. Rebekkalogen arbeider målretta for å vera ei positiv kraft i kvardagen til medmenneske, og ein loppemarknad som dette er ein fin måte å kombinera praktisk nytte med det sosiale formålet vårt. Me ønskjer å bidra til gode fellesopplevingar som knyt lokalsamfunnet tettare saman.

Sjølv om mange kom for å gjera eit kupp, var det minst like mange som tok turen for det sosiale samveret. Lukta av nysteikte vaflar og lappar spreidde seg i lokalet, og kafeen vart raskt fylt opp av folk som unna seg ein pause. Her gjekk praten livleg rundt borda, og det er nettopp desse møta mellom menneske som gjer ein slik dag så vellukka. Den gode stemninga som oppstod då kjende og ukjende sette seg ned for ein prat, var med på å gjera dagen komplett for både besøkande og oss arrangørar.

Den overveldande responsen og alle dei hyggelege tilbakemeldingane me fekk i løpet av laurdagen, gjev oss i Rebekkaloge 68 Linnea mykje motivasjon til vegen vidare. Sjølv om denne dagen stod i loppene sitt teikn, ser me fram til å invitera til fleire ulike typar arrangement i tida som kjem. Me brenn for å skapa gode arenaer for fellesskap, og gler oss stort til å ønskja både trufaste støttespelarar og nye ansikt velkomne til oss. Me gler oss også til å få visa dykk meir av kva anna me driv med i logen vår.

Me rettar ei hjarteleg takk til alle som stakk innom, handla lopper, åt vaflar eller berre bidrog med godt humør. Samstundes ønskjer me å takka Visit Sauda for god hjelp med promotering, og det same til lokalavisa Ryfylke og alle dei lokale bedriftene som hjelpte oss med å gjera arrangementet kjent. De var alle med på å gjera 28. mars til ein dag me vil minnast med stor glede.