Advarsel: Saudafjorden når nye høgder søndag
Søndag er vasstanden i Saudafjorden varsla ein meter over normalen.
Det er sendt ut farevarsel om unaturleg høg vasstand i Saudafjorden søndag. Beredskapskoordinator i Sauda, Harald Eikrem, ber innbyggarane vere merksam på farevarselet.
– Det er meldt omtrent éin meter høgare vasstand i Saudafjorden enn normalt. Folk som har båtar bør vere merksam på dette. Det gjeld også folk som har ting og eigardelar plassert ved sjøkanten, seier Eikrem.
Annonse
Han opplyser at det er sendt ut eit 20-årsvarsel.
– Det betyr at det i snitt går 20 år mellom kvar gong vasstanden i Saudafjorden blir så høg, seier Eikrem.
Beredskapskoordinatoren ber derfor innbyggarane vere ekstra merksame i morgon.
– Varselet gjeld frå klokka 08.00 i morgon tidleg og fram til klokka 12.00. Deretter skal vasstanden synke, seier Harald Eikrem.
