Byr på ny, eventyrleg lysfest

– Det er meldt godt vêr, med måneskin. Det einaste som manglar er snøen. Men kjekt blir det uansett, lovar Per Inge Fjellheim i Laget for Hovlandsnutens utvikling.

Det var i 2019 at lysfesten i Eventyrskogen på Fosstveit blei arrangert for første gong. Fjellheim var då sjokkert over det store oppmøtet.

– Me håpte på 30-40 personar, men det kom 160-170! Du skulle sett det lys-toget som kom vandrande oppover skogen i måneskinet. Det var heilt fantastisk, sa han til Ryfylke etter arrangementet.

I 2020 og 2021 sette koronapandemien ein stoppar for lysfesten. Men, nå, komande torsdag ettermiddag, blir det endeleg lysfest-arrangement igjen. Fjellheim oppfordrar folk til å gå frå Risvoll skule.

– Løypa er cirka 1,5 kilometer lang, og ein bruker gjerne 30 minutt opp. Me set ut hundre lyslykter, pluss julekassar», inspirert frå Finland, langs løypa. Det blir ein fin og stemningsfull tur i motbakke, seier Fjellheim.

Oppe i Eventyrskogen blir det grautservering og musikk, og kanskje vil ein kunna treffa på ein ekte skogsnisse.

Ifølge Per Inge Fjellheim vil det bli sett ut to juletre, og her har arrangøren fått hjelp av ein skuleklassse frå Risvoll til pynting.

– Men ta gjerne med julepynt til å henga på trea. Dei vil stå pynta til like over nyttår, seier Fjellheim, som om oppfordrar folk til å ta med hovudlykt eller lommelykt til lysfesten i desembermørket.