E-sport og minigolf nytt i år

Koronapandemien har forkludra dei to siste Barn er bra-festivalane i Sauda, men denne haustferien er dei populære aktivitetsdagane tilbake med full fres. Mange av dei mest populære aktivitetstilboda frå tidlegare år er tilbake, men det blir også fleire nye aktivitetar ein kan melde seg på.

Ein av desse er E-sport. Dette er ein idrett som har hatt eksepsjonell vekst i fleire år. E-sport er samlebegrepet for organisert konkurranse i dataspel. Idretten er i dag verdsomspennande, og fleire vidaregåande skular med idrettslinjer, har tilbod om E-sport på lik linje med til eksempel fotball og vintersport.

Topp i Europa

Gründer Thomas Gitlevaag står bak selskapet Geeks Esport, som tilbyr sosial gaming med innføring og aktivitetar innanfor esport. Selskapet blei til etter at Gitlevaag blei hyra inn til eit sommerskuleopplegg i fjor.

– Tilbakemeldingane var så bra at eg valte å satse. No har vi komprimert opplegget slik at det kan dekke ein dag med aktivitet og opplevingar. Denne hausten skal vi kome til Strand, Hjelmeland, Suldal og Sauda, der vi er med under Barn er bra, fortel Gitlevaag, som sjølv har drive med E-sport på toppnivå i Europa dei siste åtte åra.

Han fortel at tilbodet under Barn er bra, vil vere både utfordrande, sosialt og spennande for dei som vil vere med. Blant spela som det vil bli konkurrert i, er Mario Kart 8 Deluxe, der spelarane får bruke proffe ratt og pedalar, mens spelet går på storskjerm.

– Berg-og dalbane

– Ein treng ikkje ha noko forkunnskapar eller vere flink å spele om ein har lyst å prøve dette. Det blir fokusert på det vi kallar sosial speling, som viser at det går an å ha eit sosialt og givande miljø rundt spelinga, seier han.

Gründeren påpeiker at det er mange feile inntrykk blant folk, om korleis spelinteressert ungdom driv med hobbyen sin.

– At dataspel blir forbundet med stillesitting, dårleg søvn og energidrikk, det stemmer på ingen måte. Om ein skal drive med E-sport, er det fleire viktige faktorar som speler viktige rollar. Ein bør halde seg i god fysisk form, for det kan vere krevande å halde konsentrasjon og koordinasjon i orden over lang tid. Vidare bør ein vere bevisst på både søvn og kosthald. Det er ofte små marginar som skil dei beste frå resten. Detaljane betyr noko, seier han.

I løpet av opplegget under Barn er bra, lovar Gitlevaag at barna får utforske ulike spelkonsollar og spel, og at konkurranseinstinktet også blir testa.

– Det kjem til å bli ein berg- og dalbane, der dei får oppleve både glede, nedturar, fart og spenning, samt kjensla av å skulle prestere under press. Det kjem til å bli veldig kjekt, og vi håpar at mange oppdagar at speling, eller E-sport, er aktivitet som absolutt kan vere sunt å drive med, fortel han.

Mange påmeldte

Nytt under årets Barn er bra, er også tilbodet om minigolfspel. Det nye anlegget ved andedammen står klart til aksjon, og Sauda kommune får god hjelp til å organisere både dette og dei øvrige tilboda under årets festival. Kulturhussjef Astrid Espeland er blant dei som koordinerer arrangementet, og ho fortel at det er eit imponerande samarbeid som ligg bak opplegget i haustferien.

– Det er utruleg kjekt å kunne lage ein slik festival saman med så mange frivillige, lag og organisasjonar. Då vi arrangerte sist, hadde vi 182 påmeldte barn. Så kom koronaen og øydela for oss, men no er alt klart igjen, og det blir knallbra, seier ho til Ryfylke.