Ei berømt stemme klar for Sauda
Det er jazz frå aller øvste hylle som blir servert på Folkets Hus laurdag, når Karin Krog går på scena.
Laurdag kveld får Sauda og Folkets hus besøk av ei dame som ikkje treng nærmare introduksjon for dei jazzinteresserte. 85 år gamle Karin Krog har sementert seg i det aller øvste sjiktet av jazzmusikk i Norge, og har vunne eit lass av prisar og utmerkingar for sin musikk. Blant anna har ho fått Spellemannsprisen i 1974 og 2013, samt hedersprisen under Spellemannsprisen i 2012. Seinast i 2021 fekk den no 85 år gamle artisten Norsk kulturråds ærespris. Med seg på scena i Sauda har ho gitarist Staffan William-Olsson og bassist Terje Gewelt.
Krog gav ut sin første LP ”By myself” i 1964, og har sidan då gitt ut eller medvirka på mange titals utgivelsar gjennom karriera.
Annonse
– Dette er rett og slett stort. Det er enormt høg kvalitet på det ho driv med, og har drive med i så mange år. Ein konsert med Karin Krog er noko alle burde gå på minst ein gong, enten ein er jazzinteressert eller ikkje. Vi gler oss enormt mykje til dette, sa kulturhussjef Astrid Espeland til Ryfylke då konserten blei annonsert tidlegare i vinter.
