Færre sommargjester i utebadeanlegget

Sola glitrar i det blåblanke vatnet i utebassenga ved Saudahallen. Ei svak dunst av klor, glade vaksne som nyt ein fridag i sårt tiltrengt sommarvêr i Sauda. Latter og plask frå små badenymfer med armringar. Større plask frå gutegjengen som ”dødsar” så bilane utanfor anlegget får vaska vindauga.

Det er ein normal sommardag, og dei har det ikkje vore for mange av i år. Ein skulle gjerne tru at det kan vere ein viktig grunn til at utebassenget har hatt ein nedgang i talet på besøkande i sommar, men det er ikkje tilfellet, ifølge leiar i Saudahallen, Stein Ove Løvik.

– Hos oss verkar det faktisk heilt motsett. Når det er dagar med ruskevêr, då får vi normalt sett fleire besøkande enn på solskinsdagar. Folk brukar gjerne dagane på andre ting då. Derfor skulle denne sommaren eigentleg ha vore litt betre enn i fjor, om ein ser på vêret. Men slik har det ikkje vore, seier han til Ryfylke.

Oppgraderingar

Løvik visar oss besøkstala for sommaren så langt, og i løpet av dei seks første sommarvekene har Saudahallen hatt 1000 færre besøkande enn i fjor på same tid. Tala er veldig varierande frå dag til dag og veke til veke, opplyser Løvik.

– I all hovudsak er det turistar og hyttefolk som brukar anlegget om sommaren. Dei fastbuande ser vi ikkje like mykje til på denne tida. Eg trur at ein viktig årsak er at folk rett og slett har mulegheit til å gjere mykje meir i år med tanke på reising og turar. Då er det naturleg at det ikkje er så mykje turistar i Sauda, og ikkje så mange besøkande hos oss. Men dei som er her, dei koser seg, smiler han.

Kommunen har tidligare varsla at dei vil gjere diverse innkjøp for å gjere badeanlegget endaå meir attraktivt. Etter å ha mottatt fleire innspel frå publikum, falt valet ned på innkjøp av ei flytande hinderløype til bassenget.

– Det er tatt ei avgjerd på det, og der har vi valt ein leverandør. I tillegg har vi fått inn nye solstolar, og alle dei gamle flyteleikene inne i bassenget skal skiftast ut med nye. Totalt er dette ei investering på omlag 300 000 kroner, seier Løvik.

Bygging i idrettshallen

Løvik opplyser at det er planlagt at den nye hinderløypa skal vere på plass i Saudahallen i løpet av hausten. I mellomtida er det ikkje bare bassengdelen av Saudahallen som går gjennom ei fornying. Også inne i idrettshallen skjer det store ting om dagen. Tribunane som har vore plassert langs den eine veggen i hallen, er no borte.

– Det som skal gjerast der, er at tribunen er fjerna, og det skal lagast nytt golv der denne sto. Vidare skal det byggast i høgden, med nye tribunar med utstyrsbodar under. Det blir eit veldig bra løft for hallen. Det blir kjekt å sjå når alt dette er på plass. Også det reiknar vi med vil vere på hausten ein gong, smiler han.