Feirar opninga med tenniskurs for dei yngste

For tre veker sidan blei tennisbanane i Åbøbyen tatt i bruk. Det over 100 år gamle tennisanlegget har vore gjennom ei kraftig totalrenovering i regi av Åbøbyens Venner», som har tatt på seg oppdraget med å renovere tennisanlegget og fleire parkar i Åbøbyen.

Den omfattande renoveringa har resultert i to tennisbanar som nå framstår som nye med nytt dekke, ny fundamentering, nye nett og stolpar og nye gjerder rundt. Finansieringa og prosjekteringa har Åbøbyens Venner» tatt ansvaret for, gjennom å søke pengar frå ulike støtteordningar.

Laurdag føremiddag blir det snorklipping og offisiell opning av tennisanlegget.

– Det blir ei enkel markering med fokus på aktiviteten, opplyser styreleiar i Åbøbyens Venner», Odd Magne Lønseth.

Stavanger Tennisklubb stiller med eit par trenarar og fleire spelarar. Dei skal først ha litt oppvisning. Deretter vil dei bidra med instruksjon av unge spelarar i Sauda, som kan møte opp for å få litt grunnleggande opplæring i tennis på laurdag.

Frå klokka 12 til 13 er det instruksjon for spelarar i alderen 10 til 12 år. Frå klokka 13 til 14 er det instruksjon for spelarar i alderen 13-15 år.

– Me startar med dei yngste og har avtale med Stavanger Tennisklubb om å fortsette med instruksjon for eldre aldergrupper etter sommarferien, opplyser Lønseth.

Frå og med søndag blir det innført speleavgift på dei to tennisbanane, som ein kan betale via ei app-løysing. Da kan ein også bestille tid til å spele på banane.

Det vil koste 100 kroner for èin bane i èin time. Skuleungdom opp til 19 år betalar 50 kroner per bane.

Banane er opne for bruk mellom klokka 09 og 21. Åbøbyens Venner» ber om at bruken av tennisbanane skjer med utgangspunkt i at ein viser omsyn for andre, også dei som er naboar til tennisanlegget, med tanke på støynivå.