Friidrettens dag på stadion

Har du lyst til å prøva å hoppa lengde i ei skikkeleg lengdegrop? Eller å spurta på eit skikkeleg friidrettsbane? I morgon, torsdag, inviterer friidrettsgruppa i Sauda Idrettslag alle som har lyst til å prøva ulike friidrettsøvingar til Sauda stadion.

– Friidrettens dag er eit gratis stemne som er ope for alle. Me håpar dette kan bidra til å rekruttera fleire medlemmer i tillegg til at det blir ein kjekk dag for dei som alt er med i friidretten, opplyser Aud Elisabeth Stuhr, som saman med Nils Stuhr og Per Ivar Sivle er trenarar i friidrettsgruppa.

Øvingane ein kan få prøva seg på torsdag kveld er 60 meter, lengde, liten ball og 400 meter/600 meter.

– Meistring og idrettsglede står i fokus, og alle som deltar får premie, opplyser Stuhr.