Full aktivitet i Sauda Skisenter i romjula

Vêrmessig har ikkje jula vist seg frå den beste sida, men det har ikkje stoppa verken Sauda Skisenter eller skituristane.

– 1. juledag hadde me litt i underkant av 300 besøkande i skisenteret. Eg synest det er bra. Dei aller fleste var hytteturistar, seier dagleg leiar i Sauda Skisenter, Lars Reidar Fosstveit.

For Sauda som skidestinasjon synest han det er svært positivt at mange utanbygds hytteeigarar velger å feire jul på hyttene sine i Sauda.

– Det forteller meg at Sauda meir og meir blir ein destinasjon. Spesielt gledeleg er det at det er såpass mange som bruker hyttene. Før vinteren var det frykt for at hytteturistane ville utebli på grunn av høge straumprisar, seier Fosstveit.

Kvar dag i romjula, til og med nyttårshelga, vil skisenteret halde åpent.

– Foreløpig har me familieheisen og den nederste t-krokheisen i drift. Me vurderer å åpne trekket heilt opp heilt til Smalanuten, men me har litt arbeid igjen før me kan gjere det. Me vil vurdere frå dag til dag, seier Fosstveit.

Han opplyser at skisenteret har greit med snø, men at han ønsker seg litt meir snø.

– Det kom 15-20 centimeter natt til tysdag. I tillegg har me vore heldig med kunstsnøproduksjonen, seier Fosstveit.

Langtidsvarselet viser flott skivêr på onsdag. Deretter er det meldt periodar med nedbør og periodar med opphaldsvêr til over nyttår.

– Erfaringsmessig er desember i Sauda litt variabelt når det gjeld vêret, konstaterer Lars Reidar Fosstveit.