Full aktivitet på nyopna tennisbanar i Åbøbyen

– Veldig kjekt med nye tennisbanar, samstemmer Krister Åbø, Felix Bergsbakk, Oliver Ljung og Emil Moen.

Vennegjengen er blant mange som alt har latt seg lokke til dei nye tennisbanane. Det er medlemsforeininga Åbøbyen Venner som står bak det omfattande renoveringsprosjektet. Åbøbyens Venner såg seg lei av at det kommunale tennisbaneanlegget og parkane i Åbøbyen stod til forfall over fleire år, utan at det var håp om at dei ville bli prioritert i dei kommunale budsjetta. Derfor tok Åbøbyen Venner sjølv initiativ til å skaffe dei fleire millionar kronene som må til for å ruste opp dei kommunale anlegga.

Sneath´s Park blei totalrenovert i fjor. Nå er to av dei fire tennisbanane ferdige og totalrenoverte. På dei to siste banane er planen å sette opp to padeltennisbanar, men dette kjem seinare.

Vil bli speleavgift

Odd Magne Lønseth, som er styreleiar i medlemsforeininga, gler seg over at det er full aktivitet på dei to nyopna tennisbanane umiddelbart etter at dei blei ferdige.

Nå er det fritt fram for å spele utan at det kostar noko, men om ikkje altfor mange dagane fram i tid er planen å få på plass ei app-løysing slik at ein kan bestille speletid, og der det blir innført speleavgift.

– Planen er at det skal koste 100 kroner å leige éin tennisbane i èin time. Me gjer ikkje det for å tene penger, men det vil koste pengar å vedlikehalde tennisanlegget, opplyser Lønseth.

Dersom ein vennegjeng på fire personar vil spele double-tennis i éin time, vil det med andre ord koste 25 kroner per person.

Opne klokka 09-21

Odd Magne Lønseth opplyser at tennisbanane bare skal brukast mellom klokka ni om morgonen og klokka ni om kvelden.

– Dette for at ikkje naboar skal bli forstyrra. Generelt ber med dei som brukar anlegget å vise omsyn for andre. I tillegg skal ein koste over dekket etter bruk slik at banen er klar for neste spelarar. Det ligg eit sandlag oppe på membranen. Det trengs og kostast, opplyser Lønseth.

Vennegjengen Krister Åbø, Felix Bergsbakk, Oliver Ljung og Emil Moen er i full aksjon da Ryfylke besøker det nyopna anlegget.

– Me var her og spelte i går også. Det er bra banar og mykje betre enn dei gamle banane, opplyser Oliver Ljung.

Ber om at alle får sleppe til

Medan dei held på kjem det stadig fleire nye spelarar som ønsker å bruke banane.

– Nå når det ikkje går an å bestille tid, og det sikkert er mange som ønsker å prøve banane, er det fint om alle held seg til maks éin times speletid. Da får flest muleg prøvd utan å måtte vente lenge, seier Lønseth.

Han opplyser at dette tennisbaneanlegget i Åbøbyen blei opna i 1917.

– Me er ganske sikre på at det var kona til fabrikkdirektør William H. Sneath som stilte som krav at det blei bygd tennisbanar, dersom ho skulle gå med på å flytte frå New York til Sauda, seier Lønseth.