Full momskompensasjon for frivilligheita i 2022
Regjeringa aukar potten for momskompensasjon til frivillige organisasjonar med 132 millionar kroner for 2022. Sauda henta nær 800 000 kroner frå ordninga i 2021.
– Mange folk slit, og frivilligheita er der for folk. Derfor gir vi meir pengar for å få full momskompensasjon. Det er ei kjempegod investering for at lag og foreiningar skal bruke tida på aktivitet til folk og ikkje på byråkrati, seier kultur- og likestillingsminister Anette Trettebergstuen til TV 2 Nyhetskanalen.
– Dette er ein stor siger for norsk frivilligheit. Vi er veldig takksame for at regjeringa har funne rom for å betale tilbake alle momskronene til det frivillige, som sikrar god og føreseieleg finansiering i utfordrande tider, seier generalsekretær i Frivillighet Norge, Stian Slotterøy Johnsen i ei pressemelding.
Anette Trettebergstuen stadfestar også at regjeringa vil jobbe for full og rettsstyrt momskompensasjon til det frivillige, slik Hurdalsplattforma lovar.
Slik det føreslegne statsbudsjettet ser ut i dag manglar det 2,025 milliardar kroner til å dekkje momskostnadane for frivilligheita for neste år. Den årlege usikkerheita kring rundt kor mykje pengar dei vil få betalt tilbake må vekk, meiner Frivillighet Norge.
– Det er gode signal frå Trettebergstuen. Vi ser fram til at regelstyring kjem på plass, så organisasjonane blir trygge på at dei får betalt tilbake alle momsutgiftene dei har og slepper på lure på om det er sett av nok midlar, avsluttar Stian Slotterøy Johnsen.
23 frivillige lag i Sauda fekk MVA-kompensasjon frå staten i 2021. Sauda idrettslag henta drygt 290 000 kroner som den største lokale mottakere, følgt av Sauda jeger- og fiskerforening med 78 000 kroner og Sauda golfklubb med i overkant av 72 000 kroner.
(NPK)
