Grasrota elskar Andedammen

Sidan grasrotandelen blei innført i 2009 har ordninga der tipparar får øyremerka ein del av summen dei speler for, bidratt med milliardbeløp til norsk frivilligheit. I 2022 bidrog ordninga med 771 millionar kroner, noko som er ny rekord. 58 millionar av desse hamna i Rogaland.

For Sauda sin del er trenden samanfallande med landet elles. Fleire av Norsk Tipping sine kundar vel seg ein grasrotmottakar, og summen som kjem lag og organisasjonar til gode aukar.

Andedammen i vekst

Tradisjonelt har Sauda idrettslag, Sauda Røde Kors og Romania Aid toppa lista over lokale lag som får størst tilskot. Det er stoda i 2022 òg, men alle dei tre fekk i fjor mindre i støtte og hadde færre givarar enn åra i forvegen.

Vinnaren lokalt er Andedammens venner, som går frå 48 til 104 givarar og frå 19 000 til 51 000 kroner i støtte.

Til saman fekk 46 lokale organisasjonar grasrotmidlar i 2022. Desse fekk til saman drygt 732 000 kroner, 16 000 meir enn i 2021.

– Har verva

Nils Jarle Sandanger i Andedammens venner er naturleg nok glad og takksam for inntektsauken frå grasrotmidlane.

– 117 prosent auke frå i fjor er formidabelt. Eg trur det i hovudsak er to årsaker til auken. Bygginga av minigolfbanen og all merksemda rundt dette er éin, bevisst verving av grasrotgivarar ein annan. Og så tur eg endå fleire har fått augo opp for andedamområdet, seier Sandanger som legg til at midlane frå grasrotandelen er kjærkomne for drifta av området.

Pensjonistane speler mest

Grasrotandelen utgjer sju prosent av beløpet det blir levert spel for, 14 prosent for enkelte spel. Basert på mottatt støtte og talet på støttespelarar er det som tidlegare dei som gir sin grasrotandel til Sauda Pensjonistforening som legg igjen mest pengar hos Norsk Tipping.

I snitt har desse spelt for nesten 24 000 kroner kvar i 2022. Dei som støttar Nasjonalforeningen Sauda Demensforening har spelt for sør 19 000 kroner kvar og dei som gir sin del til Sauda Idrettsråd snautt 17 000 kroner.

Tipparar som har Sauda Asfalt Force som mottakar nøyde seg med å tippa for 1 351 kroner i 2022, i andre enden av lista.

Den gjennomsnittlege grasrotgivaren i Sauda tippa for rundt 7 000 kroner i 2022.

Grasrotandelen 2022, Sauda kommune: