Henrik (8) med storfangst i Kastfoss

– Den var kjempetung, men eg håpar vi får ein på elleve kilo neste gong, glisar Henrik Jensen (8). Han har nettopp fått sin aller første laks. Den var meir enn fire kilo tung, og beit på kroken til Henrik ved Kastfoss.

Også mamma Elina har hatt ein god start på årets laksefiske. Måndag fanga ho ein blank villfisk på fem kilo. Den tok ho på spinnar.

Laksefisket i saudaelvene starta 20. juli, men det var ikkje før søndag at det kom nedbør som gav elvene vatn nok til å få fart på ventande laks. Dermed var måndagen ein smart dag å prøve seg etter den blanke, ettertrakta fisken i Sauda.

– Det var ein veldig god fiskedag, og så vidt eg har fått med meg, blei det tatt til saman åtte laks i elvene denne dagen, fortel Mats Ringstrand, som er Sauda jeger- og fiskerforening sin kontaktperson for elvefiske, og sjølv ein ihuga sportsfiskar.

Han fekk sjølv årets så langt største laks. Den blanke villfisken var ti kilo tung, og blei tatt på floge.

– For min del var dette ny pers i saudaelvane, så det var veldig kjekt. Ein flott fisk, seier Ringstrand.

Fangstkvote

Ringstrand fortel vidare at vassføringa elvane steig med eit par kubikkmeter til måndag, og dette har ført til at fleire laks har tatt seg oppover i elvene. Med ny fisk i dei ulike hølane i elva, er laksen ofte uroleg og hissig, og då kan det vere lurt å prøve fiskelykka.

Sjølv om det blei fanga heile åtte laks på måndag, vil ikkje Ringstrand friskmelde» laksestammen i Sauda på nokon som helst måte.

– Nei, det er heilt klart ein liten og sårbar stamme, som ennå ikkje er berekraftig. Det gjeld også i år ein kvote på 15 fisk i kvar av elvene, og det er etter mi meining rett å halde fram med. Ein kan halde seg oppdatert på fangstane på nettstaden Elveguiden», fortel han.

Fiske ut august

Fjorårets laksefiske i Sauda var sterkt prega av stor oppgang av pukkellaks, ein uønska art som ikkje lever naturleg i norske elvar. Så langt i år har denne arten ikkje vist seg i saudaelvane.

– Nei, den nærmaste elva som pukkellaks er observert i, er i Etne. Eg har ikkje sett noko her i elvane endå, og det er bra, seier Ringstrand.

Dei åtte laksane som blei fanga måndag, var alle av god storleik, med ei snittvekt på over fem kilo. Om ein har lyst å prøve seg på laksefiske i saudaelvane, er det anledning til det, opplyser Ringstrand.

– Då besøker ein elveguiden» på nett, og følger instruksane der. Ein må ha betalt den statlege fiskaravgifta, og fiskekort i saudaelvane gjeld for begge elvane. Fisket varar ut august, eller til kvotane er fylt opp, opplyser han.