I år blir det 40 stolpar og nye utfordringar

– Målet må vera å passera tusen deltakarar i år. Dette var jo ein av påstandane i Ryfylke sin spådomskonkurranse i år. Eg tippa nei», eg. Men det var mest for å erta kona. Ho tippa ja». Eg håper jo at ho får rett, humrar Jon Ove Mehus, leiar i idrettslaget Ny Von.

Oppstart 1. mai

Det var kona hans, Kjellfrid Mehus, som først kom med forslag om å arrangera Stolpejakten i Sauda. Jon Ove Mehus tok det opp i styret i Ny Von, som straks likte ideen. Den første Stolpejakten i Sauda blei arrangert i 2021, med 20 stolpar. I debutåret deltok 443 personar. I fjor blei også Sauda Turlag med som arrangør, og jakta blei utvida med 20 stolpar i Saudasjøen. I 2022 var det til saman 837 personar som var på stolpejakt i Sauda og Saudasjøen. Det første året varte stolpejakt-sesongen i Sauda i bare tre månader, i fjor varte den i fire. I år blir sesongen endå lenger, med oppstart alt 1. mai.

– Me begynner på måndag, ja. Men framleis er det snø i fjellet, så dei lengste turane må folk venta litt med å starta på. Dette gjeld Djuvsbotn, Svandal, Brekkestølsnuten og Stemmen på Flatskår. Me reknar med at stolpane vil vera klare på desse stadene først 15. mai, forklarer Mehus.

Ein deltar ved å registrera stolpane, anten manuelt, digitalt eller gjennom ein app.

Fleire nye stolpar

Blant dei 40 stolpane som skal settast ut i Sauda og Saudasjøen i vår er det fleire nye turmål, i tillegg til fleire turmål som også var med i fjor.

– Me har fått mange gode tilbakemeldingar frå folk som synest det er kjekt å få komma seg ut på nye turmål og bli endå betre kjent med bygda si. Me har også fått mange tips og ønsker om kor me kan setta opp nye stolpar. Fleire av desse tipsa har me følgt i år. Og me har planar om endå fleire nye turmål neste år. Me har massevis av nye turmål å bruka i åra framover, seier Mehus.

Mange trekkepremiar

Hovudmålet med Stolpejakten er å bidra til auka fysisk aktivitet blant folk flest over heile landet». Dei enklaste stolpane, som er merka som grøne, kan enkelt nås med sykkel, rullator, rullestol eller barnevogn. Det viktigaste er, ifølge Mehus, ikkje å bli best eller vinna Stolpejakten, men å komma seg ut og konkurrera med seg sjølv.

– Derfor er me ikkje så opptatt av å kåra ein vinnar. Men me har fleire trekkepremiar. Me trekker ut premievinnarar både blant dei ti beste på poengsum, blant dei som har tatt alle 40 stolpane, blant dei som har tatt over 20 stolpar og blant dei som har tatt over ti stolpar. Her har alle gode sjansar til å vinna, seier Jon Ove Mehus i Ny Von.

I fjor fekk ti år gamle Erle Vatne Aas premie for å vera den som tok alle dei 40 stolpane først. Ho tok alle stolpane før det var gått ei veke. Pensjonisten Jon Hansen (76) samla heile 20 001 poeng i fjor.

Stolpar i Sauda:

Grøne: Varden i sentrum, Tangen, minigolfbanen/Andedammen, Sneath´s park, steinbru ved Høllandsfossen, leikeplassen på Kleppeker, kaien ved ambulansestasjonen, Saunes, Kastfossbrua og Egne Hjem.

Blå: Juvastøl, Juvastøl-sti ved grinda, Sagfossen, kraftstasjonen i Lona og Litlaberget i Fløgstadåsen.

Raude: Fløgstadtjødna, Forekammen i Fløgstadåsen, inntaksdammen på Fiveland og Brattebakken.

Svart: Tempreidnuten.

Stolpar i Saudasjøen:

Grøne: Risvoll skule, Hovland, gamal kyrkjegard, kapellet, kryss mot industriområdet, Si-Glass-kaien, Nordag-bunkers, Nesbru/gamal bru, Tinghaug og enden av Rødstjødna.

Blå: Dagsturhytta, Lyngmyr-garasje, Lyngmyr-gapahuk på Brendåsen1 og Lyngmyr-gapahuk på Brendåsen2.

Raude: Nordstøldalen gapahuk, Djuvsbotn/Svandal, frisbee-banen/Svandal og pumpehus i Åsane hyttegrend.

Svarte: Stemmen/Flatskår og Brekkestølsnuten.