Ingen Hovlandsnuten Opp i juni

I fjor hadde det tradisjonsrike motbakkeløpet Hovlandsnuten Opp 900 påmeldte, til tross for ruskete vêr og andre arrangement som kolliderte med løpsfesten i Saudasjøen. I år tar arrangøren grep, og flytter heile arrangementet til etter sommarferien. Hovlandsnuten Opp 2023 blir arrangert 2. september, to dagar inn i den første haustmånaden.

– Det er hovudsakleg to grunnar til at vi har beslutta å gjere det sånn i år. For det første kolliderer den andre laurdagen i juni med mange andre arrangement og cupar andre stader, og for det andre er det større sjanse for fint vêr i starten i september, seier leiar i styret for Hovlandsnuten Opp, Sander Stielstra.

– Ikkje NM

Stielstra fortel at interessa for Hovlandsnuten Opp var bra også i fjor, men at styret har kome fram til at det sannsynlegvis vil passe betre for fleire om det blir arrangert i starten av september, då skulen har starta opp igjen og kvardagen er tilbake for dei fleste.

– Om det vil slå positivt ut, det veit vi ikkje sikkert, men vi håpar og trur at det vil det, fortel han.

I fjor hadde Hovlandsnuten Opp status som NM i motbakkeløp, men i år skal arrangementet stå heilt på eigne føter.

– Det blir ikkje NM i år, men elles vil det bli arrangert på same måte som tidlegare, med dei same løpsklassane, familiefest og underholdning for dei yngste. Vi gler oss veldig, og er spente på om folk reagerer positivt på endringa som blir gjort, seier Stielstra til slutt.