Jaktar hobbybakarar frå Distrikts-Norge til NRK-satsing

NRK er nå i innspurten av jakta på deltakarar til si nye storsatsing Bakemesterskapet». Der skal dyktige og lidenskapelege hobbybakarar konkurrera om å bli Norges beste. Då treng produksjonen brei og god representasjon frå heile det norske folket.

– Veldig mange har alt meldt seg på bakekonkurransen, og no leitar vi spesielt etter gutar og bakarar frå Distrikts-Norge, seier prosjektleiar i Bakemesterskapet» Anders Myhr Nielsen.

– Vi ønsker å nå ut til distrikta. Vi skal kåra Noregs beste hobbybakar, og då er det viktig at heile Norge blir representerte, seier Nielsen.

– Vi veit det er mange gutar som er flinke til å baka. No har dei sjansen til å visa fram det dei kan, seier Nielsen og produksjonsleiar Andreas Berge.

Røper TV-hemmelegheit

Alle hobbybakarar over 16 år kan søka, uansett kva spesialitet ein har. Det kan vera alt frå kjeks, tradisjonsbakst, kaker og brød, til å vera dyktig på å lage sjokoladeskulpturar. Eller noko heilt anna.

– Det er mange som er ekstremt flinke, som tenker at dei ikkje er gode nok. Det er litt typisk norsk, men det må me slutta å tenka. Viss du elskar å halda på med noko, er du sannsynlegvis veldig mykje betre enn dei aller fleste, seier Nielsen.

Han kan og røpa ein liten TV-hemmelegheit.

– Fleire av oppgåvene får ein tid til å førebu seg til i forkant. Viss det er noko ein ikkje har bakt så mykje før, har ein tid til å øva seg.

– Det er viktig å presisera at det er hobbybakarar vi søker etter, og at profesjonelle bakarar, konditorar og kokkar kan ikkje vera med. Det vil seie at hovudinntektskjelda ikkje kan vere frå kommersiell baking. Deltakarane kan heller ikkje tidlegare ha jobba heiltid som bakar eller kokk.

Søknadsfristen går ut i romjula. Over nyttår skal NRK på ein castingturné rundt om i landet for å møte mange av dei som har søkt. Serien skal spelast inn i Bergen i april/mai.