Laurdag er det på nytt klart for Hovlandsnuten Opp

Første gongen Hovlandsnuten Opp blei arrangert var i 2007, etter initiativ frå Per Inge Fjellheim og svigersonen Åge Fjellheim Midthun. Motbakkeløpet har etter kvart blitt populært blant både aktive som spring på tid, og blant trimmarar som ønsker å gå opp utan tidtaking.

I alle år har Hovlandsnuten Opp blitt arrangert i juni, men i år blei arrangementet flytta til slutten av august. Det overordna ansvaret er det Sauda Ferie & Fritid som har i år, sjølv om mange i støtteapparatet er dei same.

Ragnar Fosstveit i Sauda Ferie & Fritid håpar flest muleg stiller opp laurdag, enten dei ønsker å stille i tidtakarklassen eller dei ønsker å gå ein tur i frisk luft.

For dei som ikkje ønsker å gå opp til nuten, anbefaler Ragnar Fosstveit ein tur opp i løypetraseen. Der kan ein slå seg ned med litt mat og drikke og heie på deltakarane, og på den måten vere med å skape ei ramme rundt arrangementet.

Eigen kostymeklasse

Nytt av året er at det er fjerna ein klasse, men også lagt til ei ny klasse. Arrangøren blei i fjor inspirert av ein deltakar som gjekk opp i fullt ku-kostyme. Nå kan ein melde seg på ei eiga kostymeklasse, der det også blir premiering for beste kostyme. Sherpaklassen er tatt ut i år.

– I tillegg vil me ha ein entusiastpris. Me har ein jury i løypa, men me seier ikkje kven dei er eller kor dei står, seier Ragnar Fosstveit lurt.

Konkurranseklassen og trimmarar som ønsker å gå opp på tid, har start klokka 12.00. Trimmarar som ikkje vil gå på tid kan starte alt frå klokka 08.30 og utover etter eige ønske. All start skjer frå Risvoll skule. Der blir det også premieutdeling etter løpet.

Men alle som deltar får ein medalje på toppen, også dei som ikkje går på tid.

Liv og røre på Risvoll skule

– Ungar får medalje på Hovlandsstølen. Der vil det også bli litt aktivitetar. I tillegg blir det aktivitetar på Risvoll skule. Der skal me også teste ut eit nyinnkjøpt hoppeslott. Også dei politiske partia vil ha stand på Risvoll skule denne dagen. I tillegg blir det sal av pølser, hamburgarar og slikt, opplyser Ragnar Fosstveit.

I fjor deltok 170 personar i ulike tidtakarklassar. I tillegg deltok 300-400 barn, vaksne og eldre i trimklassen.

Deltakarrekorden er frå 2014, første året motbakkeløpet i Saudasjøen var NM. Då deltok heile 1 170 personar.