Mental Helse Sauda: – Bli med og sjå musikkfesten med oss!

Laurdag kveld er det duka for Eurovision Song Contest, glitter og fest i Liverpool. Vertsnasjon for årets konkurranse er Ukraina, etter at dei vann konkurransen i fjor, men sjølve showet blir arrangert i den engelske hamnebyen. Norske Alessandra tok seg vidare til finalen, og alt ligg an til ein skikkeleg spennande kveld med musikk, glitter og dårleg skjulte politiske bodskapar.

I Mental Helse Sauda sitt lokale Møteplassen, blir det gjort klart til festaftan. Her blir heile sendinga vist på storskjerm, og alle som har lyst å sjå konkurransen saman med nokon, er inviterte. Leiar ved Mental Helse Sauda, Martha Gulbrandsen, gler seg ekstra til denne kvelden.

– Dette blir veldig kjekt. Vi er fleire her som synest det er gøy med ESC, og vi bestemte oss for å gjere dette til eit uformell og morosam kveld der vi kan heie og kose oss saman, seier ho.

– Pynt er frivillig

Gulbrandsen seier at det skal vere lågast muleg terskel for å bli med på ESC-kvelden på Møteplassen.

– Mange sit gjerne heime og tenker å sjå på showet åleine. Kvifor ikkje ta turen ned og sjå det med oss? Vi har i alle fall tenkt å pynte lokalet opp med ballongar og litt glitter og glam, og vi skal pynte oss litt for festen. Alt er så seriøst i kvardagen, så eg trur det blir fint å lage litt uhøgtideleg gøy. Om ein vil pynte seg eller ikkje, er heilt opp til kvar enkelt. Det blir hyggeleg uansett, seier Gulbrandsen.

Møteplassen er Mental Helse Sauda sine lokale i Åbødalsvegen, der det blir arrangert både uformelle dagar for å møtast, samt ulike føredrag, kurs og opplegg med psykisk helse som gjennomgåande tema. Lokala blir også flittig brukt som møteplass for saudabuar som ikkje har stort sosialt nettverk eller ønsker nokon å prate med.

Gulbrandsen opplyser at Møteplassen opnar i god tid før sendingane startar, og at arrangementet er alkoholfritt.