Minigolf-feberen herjar i Sauda

– Responsen har vore så mykje større enn venta. Det er ingen tvil om at me kjenner på glede og ei stoltheit over at anlegget er blitt så bra som me håpa på, seier Nils Jarle Sandanger i Andedammens Venner.

Det er drygt to år sidan Andedammens Venner begynte planlegginga av ein minigolfbane i Andedammen-området. Onsdag ettermiddag denne veka blei banen offisielt opna, med mellom 200 og 300 frammøtte, snorklipping, talar, minikonsert, gratis pølser – og sjølvsagt speling på banen. Men, minigolfbanen har vore i drift heilt sidan søndag 31. juli.

– Søndag 4. september, etter fem vekers drift, hadde me hatt 1 877 spelarar på banen sidan den blei tatt i bruk, fortel Sandanger.

Aller best besøk var det måndag 2. august, då heile 136 personar spelte minigolf.

Populær bane

Banen var open kvar dag i skuleferien. Då skuleferien var over låg besøkstala på rundt 1 300-1 400. Frå og med 15. august har banen kun hatt ope tysdag og torsdag ettermiddag, pluss heile dagen laurdag og søndag. Men banen er også i bruk utanom dei offisielle opningstidene.

– Me har hatt eit par klassemiljøtiltak her, og tre-fire bursdagar og tre-fire firmabesøk. I tillegg har me hatt ulike lag og foreiningar som har bestilt speletid, fortel Sandanger, som registrerer at også hyttefolk bruker banen flittig.

Medan vêret skapte utfordringar for sjølve ferdigstillinga av banen i vår og sommar, har vêret verkeleg spelt på lag dei siste vekene, og skapt syden-stemning» på minigolfbanen.

Området og kiosken har hatt så godt besøk at is-leverandøren har måtta senda ein større isboks til kiosken.

Nesten gjeldfritt anlegg

Då styret i Saude utvikling, som er driftsselskapet til minigolfbaneanlegget, jobba med finansieringsplanen for prosjektet, såg dei føre seg å måtta låna éin million kroner for å få realisert banen. Så mykje lån var ikkje nødvendig, for fleire lokale sponsorar har velvillig opna lommeboka for å støtta prosjektet.

– Me enda opp med å bare måtta låna 150 000 kroner. Så alt ligg til rette for at me kan halda fram med eit økonomisk driftssikkert anlegg framover, seier Sandanger.

I dag er det løna skuleungdommar som driftar anlegget i helgane. Sandanger sjølv driftar det på dugnad tysdag ettermiddag, pluss to av dei fire opningstimane på torsdagane.

– Samlingsgruppa Cars & coffee, med Erik Hovland og Vidar Alexander Risvold i spissen, har tatt på seg å drifta anlegget to timar torsdagskveldane, opplyser Sandanger.

Arbeidet held fram

I dag, torsdag, var Ryfylke innom anlegget for å ta bilde av dei to golfbane-eldsjelene Nils Jarle Sandanger og Hans Søndenå. Dei var då framleis overvelda etter det store oppmøtet under den offisielle opninga ettermiddagen i førevegen. Sjølv heldt dei seg i bakgrunnen under opningsarrangementet.

– Me er ikkje så glade i oppmerksomheit, nei. Det knyta seg i magen i frykt for at me måtte komma fram og seia noko eller ta imot noko. Då var det godt å kunna skubba Filippo Ballarin (styreleiar i Saude utvikling, red. merkn.) fram heller, innrømmer Sandanger.

Dagleg er det dugnadsprosjekt på gang i Andedammen-området for dei to eldsjelene. Blant anna ryddar dei etter opninga, og haustens lauv frå bjørketre må fjernast frå banen.

– Me får stadig vekk gode tilbakemeldingar frå folk i området. Samtidig får me også ulike innspel og ønsker, så heile tida jobbar me med justeringar og forbetringar, forklarer Nils Jarle Sandanger.