Nær 900 000 kroner i julegåve til lokal frivilligheit

Frå 2010 har frivillige lag og organisasjonar kunna søka staten om kompensasjon for betalt meirverdiavgift ved kjøp av varer og tenester. Løyvingane til ordninga har auka for kvart år, og for rekneskapsåret 2020 fekk frivillige organisasjonar for første gong kompensert all innbetalt meirverdiavgift.

Tildelinga for 2021 var klar siste veka for jul, og for andre året på rad får frivilligheita tilbake heile søknadssummen. Det betyr at drygt 22 000 søkarar får kompensert i overkant av to milliardar kroner. Beløpet er rekordstort, meir enn 200 millionar kroner meir enn året før.

28 lokale mottakarar

Årets tildeling sender nesten 900 000 kroner til frivillige organisasjonar i Sauda. Dette er ein auke på nær 100 000 kroner frå året før og rundt 230 000 kroner frå 2019. Også talet på lag som nyttar seg av ordninga har stige, frå 23 i 2020 til 28 i 2021.

Ikkje uventa mottar Sauda idrettslag mest av dei lokale laga. Kompensasjonen dei får for 2021 er imidlertid 120 000 kroner lågare enn i 2020. Dette heng naturleg saman med aktivitetsnivå på investeringsfronten.

Blant dei nye organisasjonane på lista er Åbøbyens venner, som dei siste åra har arbeidd med ei totalrenovering av Sneath’s Park.

Formålet med momskompensasjonsordninga er å fremma frivillig aktivitet. Det blir ikkje kravd rapportering for bruken av midlane.

Midlane blei utbetalt før jul.

Momskompensasjon for 2021, Sauda kommune

Utvalde organisasjonar med adresse Suldal kommune

Slik blir dei nasjonale midlane fordelt