Politiet tok i mars i bruk ein ny laserteknologi i fartskontrollar. Den har vist seg å vere veldig effektiv og no kan politiet ta fartssyndarar på nye stadar. Her er justisminister Emilie Enger Mehl med utrykkingspolitiet på fartskontroll i 2022.
NPK
No kan du bli teken i fartskontroll på nye stadar
Den nye laseren kan måle både nærare og lenger unna enn den som blei brukt før.
– Den førre kunne måle frå 100 meter til 400 meter. Denne kan måle frå 30 meter til 500 meter, seier distriktsleiar i utrykkingspolitiet i Nord-Noreg, Geir Martinsen, til NRK.
Det betyr at politiet framover mest sannsynleg vil stå på stader det tidlegare var umogleg å ta fartssyndarar.
I tillegg har den nye laseren video- og biletfunksjon. Det gir også ei rekke forbetringar.
Den nye laseren gjer det òg mykje enklare å ta ei rekke med bilar. Det var også mogleg med den gamle teknologien, men langt vanskelegare då vinkel påverka målinga i større grad.
– No kan vi ta både tre, fire og fem på rekke. Vi har fleire døme på at det fungerer godt, seier Martinsen.
