Nye sherpatrapper under Hovlandsnuten

– Det er veldig kjekt å vera i mål med haustens prosjekt. Eg er veldig letta nå, ja. Det har vore eit krevande arbeid, med planlegging, oppfølging og praktisk tilrettelegging. At eg nå er pensjonist har vore ein kjempefordel, spesielt oppfølging av mengden stein, transport og økonomien. Mange netter mista eg nattesøvnen fordi eg bekymra meg slik, seier Per Inge Fjellheim, styreleiar i Laget for Hovlandsnutens utvikling.

Starta i 2014

I 2014, sju år etter at motbakkeløpet Hovlandsnuten Opp blei arrangert for første gong, kom det første sherpalaget til Sauda for å bygga steintrapper i traseen opp til den 931 meter høge nuten. Initiativet kom frå det då nyetablerte selskapet Laget for Hovlandsnutens utvikling, med Åge Fjellheim Midthun og Espen Thompson i spissen. I løpet av dei neste åra kom fleire sherpalag i tur og orden til Sauda for å legga steintrapper i delar av turtraseen. Etter at Laget for Hovlandsnutens utvikling hadde jobba med å skaffa finansiering til nok eit trappeleggingsprosjekt, kunne eit nytt sherpalag komma til Sauda i oktober i år.

– Sherpaene er ettertrakta, så me var heldig som fekk dei hit i 15 dagar. Eg rekna på det og fann ut at det var best, økonomisk, praktisk og effektivt, at me denne gongen kjøpte naturstein frå Karmøy, i staden for at dei skulle bruka tid på å leita etter, flytta på og meisla ut steinblokker ute i terrenget, forklarer Fjellheim.

Sherpaene blir leigt inn via det norske firmaet Stibyggjaren AS.

Lastebil og helikopter

3. oktober kom lastebillass frå Karmøy Naturstein AS til Sauda. På grunn av at vegen til Nordstøldalen då var periodevis stengt, og hadde vektavgrensingar, gav grunneigar Dagfinn Birkeland klarsignal til at lastebilane kunne kjøra dei store steinblokkene opp til enden av Lyngmyrvegen.

8. oktober kom dei fire sherpaene til Sauda, klare for to veker med steintungt stibyggingsarbeid. Det blei først festa såkalla rundslings» på steinblokkene, klare for å frakta dei opp i terrenget med helikopter. Den største steinblokka vog over eitt tonn. Dei fleste andre steinblokkene låg på rundt 600-700 kilo.

Fleire prioriterte område

På førehand hadde Fjellheim og hans medarbeidarar valt ut tre-fire prioriterte område som dei ønska å utbetra denne gongen. Dette gjaldt først og fremst nede ved den gamle linjehytta, der det var blitt eit ganske vått og grapsete» stiområde. Også i det første skikkeleg bratte partiet etter tregrensa var det behov for gode steintrapper. I tillegg blei det lagt nye steintrapper lenger oppe nærare nuten.

– Ved å laga nye trapper i det som er eit skrått og vanskeleg terreng, fekk me knytt saman to tidlegare bygde trappedelar nedanfor nuten. I tillegg blei det laga trapper gjennom det veldig steinete området ein må passera før ein rundar opp det siste stykket mot nuten, forklarer Fjellheim.

Her øverst blei det valt å bruka stein frå terrenget.

– Det er åtte-ti steinblokker igjen som me ikkje fekk floge opp og brukt. Elles gjekk alt heilt etter planen, seier Fjellheim, som brukte Excel-ark i det nøysame planleggingsarbeidet.

Tømte kontoen

Måndag 24. oktober hadde dei fire sherpaene sin aller siste arbeidsdag. Då hadde dei fått lagt nye steintrapper i tre av dei fire prioriterte områda. Per Inge Fjellheim er svært godt fornøgd.

– Totalt har dette prosjektet kosta rundt 870 000 kroner. Av det me hadde på konto, står det nå igjen under 10 000 kroner. Det gjekk akkurat, seier Fjellheim letta.

Prosjektet er finansiert ved hjelp av økonomisk støtte frå Sparebankstiftelsen Sauda, Ryfylkefondet/Ryfylkealliansen, Sparebanken Vest, Saudefaldene, Helitrans AS, Eramet Norway, Sunnhordland kraftlag og Sparebankstiftelsen Vest itillegg til SMIL-midlar.

– Og litt eigenkapital og store og små vippsarar, fortel Fjellheim.

Høg arbeidsmoral

Etter å ha sett dei fire profesjonelle stibyggarane frå Nepal i aksjon, er Per Inge Fjellheim imponert over kvaliteten på arbeidet, på styrken deira og på arbeidsinnsatsen og arbeidsmoralen til sherpaene. Arbeidet ber preg av perfeksjonisme.

– Når dei har lagt steinblokkene og laga trapper, er dei ute i terrenget og hentar tuver som dei pakkar inn rundt steinblokkene. Det gjer at det ser ut som at trappene har lege der i årevis alt, fortel Fjellheim.

Og nå, med nye steintrapper i store delar av traseen der det før var vått, sleipt, glatt og skrått, kan det kanskje bety nye løpsrekordar når Hovlandsnuten Opp skal arrangerast i juni neste år?

– Ja, ein skulle tru det. Samtidig er det også tungt å gå i trapper, så det gjenstår å sjå, smiler Per Inge Fjellheim, styreleiar i Laget for Hovlandsnutens utvikling.