Ønsker å bygge løype for terrengsykling
Vennegjengen har savna ein terrengsykkelpark i Sauda. Nå ønsker dei å bygge den sjølv.
Olav Skogerbø Selvik, Kristian Wahl Jensen og Vegard Tveit er alle interessert i terrengsykling, men i Sauda er det ikkje ei eiga etablert løype. Det ønsker dei tre å gjere noko med. Dei har inngått avtale med grunneigar Ola Magnar Birkeland som stiller eit skogsområde til disposisjon på Birkeland, rett ved stien som går frå Kastfoss mot den gamle vassfabrikken i retning Lona.
Målet er å anlegge ein terrengsykkelpark med sykkelstiar og ulike hopp der store og små med terrengsyklar kan utfolde seg.
Annonse
– Me er interesserte i å bygge ei løype som både me vaksne kan bruke, men også ei løype som ungane våre kan bruke. Me er opptatt av å lage eit tilbod for alle, seier Olav Skogerbø Selvik.
Kristian Wahl Jensen trur det er eit fint område som eignar seg godt som terrengsykkelpark.
– Me trur dette blir eit godt tilbod. Eit tilbod som ikkje fantest da me var unge, seier Wahl Jensen.
Søker kommunen om lov
Annonse
Dei har nå sendt byggesøknad til Sauda kommune om å få lov til å etablere terrengsykkelløypa. Løypa skal gå innanfor eit område på 250 ganger 40 meter. Sidan området er i eit LNF-område treng dei å få godkjent søknaden som ei dispensasjonssak.
Med seg på laget har dei fått Sauda Sykkelklubb. Då dei tre leverte søknad fekk dei beskjed om at byggesøknad og dispensasjonssøknad til saman ville koste litt over 20 000 kroner. Sauda Sykkelklubb har tatt på seg å betale desse saksbehandlingsgebyra, slik at dei tre initiativtakarane slepp å starte prosessen med å betale dette med eigne pengar.
Vil søke etter midlar
– Terrengsykkelparken er ikkje finansiert ennå. Først må me få lov til å bygge den. Deretter vil me starte ein søknadsprosess for å skaffe midlar, opplyser Skogerbø Selvik.
Dei har ikkje utarbeidd eit fullstendig budsjett ennå. Uansett vil dei tilpasse antall element i parken ut ifrå kor mykje pengar dei får inn i støtte. I løypa vil det bli bygd ulike hopp og element i tre, i tillegg til å opparbeide sykkelstiar med doserte svingar og hopp.
Olav Skogerbø Selvik er anleggsmaskinførar og vil derfor utføre grunnarbeidet på dugnad, dersom ein maskinentreprenør vil sponse dei med gratis lån av maskin.
Annonse
– Det vil bli fleire løyper med ulik vanskelegheitsgrad både for nybegynnarar og dei meir erfarne. Me vil behalde dei største trea i området, seier Skogerbø Selvik.
