Siste laks fanga for i år – No er elvene stengde

Tysdag blei den femtende og siste laksen for i år fanga i Storelva. Det var ein flott fisk på 5,5 kilo som lot seg lure av ein spinnar.

Laksefisket har vore godt i saudaelvane i år. Gode nedbørsperiodar har gitt tidvis god vassføring og oppgang av laks. Sauda jeger- og fiskerforenings kontaktperson for saudaelvane, Mats Ringstrand, fortel at sesongen både i Sauda og andre stader på Vestlandet har vore prega av gode forhold for laksen i sjøen.

– Det har vore god tilgang på mat, for laksen som har gått opp i elvene, har vore velfødde og store. Det har bidratt til at snittstorleiken på laksen som er fanga i Sauda, har vore så høg som 4,8 kilo, seier han.

Ringstrand sjølv sette personleg lakserekord på floge i Sauda, med ein rugg på heile ti kilo.

Vil ikkje auke kvoten

Ein av dei som fanga laks i Sauda denne sesongen, var Henrik Jensen (8). Han fekk sin aller første laks i sommar. Den vog meir enn fire kilo, og beit på kroken til Henrik ved Kastfoss.

Mats Ringstrand fortel til Ryfylke at det i desse dagar blir sett i verk ytterlegare tiltak for å ivareta og hjelpe laksestammen i saudaelvane. I løpet av dei kommande vekene skal det nemleg fyllast så mykje som hundre kubikkmeter med gytegrus i fleire av hølane i Storelva. Det gir laksen betre gyteforhold, og kan dermed bidra til ein auke i bestanden.

Trass i den gode sesongen og nye tiltak for laksebestanden, er det neppe aktuelt å auke kvota på til saman 30 laks neste år.

– Nei, det er ikkje sannsynleg. Laksestammen er både liten og sårbar, avsluttar han.