Sjekk dei unge sprekingane!

– Det er kjekt å gå til nye nutar. Nokre gonger er det ganske slitsamt, men det er alltid veldig godt å komma fram til varden. Ein gong var me på tur i 13 timar, men me har jo pausar, så klart, fortel Jan Lunde.

Tre unge, spreke

I oktober i år blei 2021/2022-sesongen av Sauda Seven Summits avslutta. Konseptet går ut på at ein i løpet av eitt år, frå oktober til oktober, tar seg opp til sju bestemte nutar i Saudafjella. Då styret i Sauda Seven Summits oppsummerte 2021/2022-sesongen merka dei seg at tre ungar var blant dei 77 deltakarane som hadde klart å fullføra alle sju nutane:

Dei to tiåringane Jan Lunde og Snorre Handeland – og fem år gamle Jonar Tveitane.

Ville slå søstrene

– T-skjorta er litt for stor, fortel Jonar, som fyller seks år i januar.

Alle som fullfører Sauda Seven Summits får nemleg ei t-skjorte, som synleg bevis på bragda. Femåringen druknar i den minste størrelsen.

Jonar sine to eldre søstrer har også vore med på Sauda Seven Summits tidlegare år, men ingen av dei var så unge som Jonar då dei deltok.

– Jonar ville slå søstrene sine. Me hadde også høyrt at John Magne Øverland var på Kyrkjenuten då han var seks år. Så han ville slå den rekorden» også, fortel pappa Jone Tveitane.

Han og Jonar gjekk derfor til Kyrkjenuten i september i år. Kyrkjenuten er Sauda høgaste fjelltopp og ligg 1 602 meter over havet. På denne turen var dei også oppom Indrejordsnuten på vegen. Kyrkjenuten var ikkje ein av nutane i 2021/2022-sesongen, men er blant dei sju nye nutane i 2022/2023-sesongen.

Har HMS-bag

Alle dei sju nutane Jonar fullførte sist sesong blei tatt utan ski på føtene.

– Den kjekkaste var Skaulen, for då var faster Sigrid og faster Barbro med, fortel Jonar.

Han liker godt det sosiale med turane.

Turen til Helgedalsnuten i august var også kjekk, ifølge Jonar. Då låg han og pappa i telt.

– Me vel stort sett solskinsdagar. Og HMS-bagen er alltid med. Me er alltid førebudd på overnatting, uansett kor turen går, seier pappa Jone Tveitane.

Jonar, som går i Brakamoen Barnehage, har lyst til å delta også inneverande sesong.

– Han har sagt at han vil delta sju gonger, sidan det er Seven Summits, smiler faren.

Kjekt med telting

Snorre Storevik Handeland går i femte klasse på Austarheim skule og blei ti år i september. I perioden 26. mars til 18. september i år besøkte han alle dei sju Seven Summits-nutane.

– Eg var med fordi det er kjekt å gå på tur. Det var bare Nevroldsnuten eg hadde vore på før, for den ligg nær hytta vår i Herheimsdalen. Dei andre seks nutane hadde eg ikkje vore på tidlegare, fortel Snorre.

Tiåringen synest turen til Helgedalsnuten 10. september var den kjekkaste. Då låg han, pappa Jarle Handeland og mamma Åshild Storevik i telt ved Grotbotnane.

– Det var ein fin tur, men på veg heim begynte det å pøsregna, fortel Snorre.

Han likte også godt turen til Røldalssåta i august.

– Det er ikkje så langt i kilometer, men veldig bratt. Eg blei ganske sliten, innrømmer han.

Å komma fram til varden er alltid kjekt.

– Det er ein siger. Det var spesielt kjekt då me kom opp til Skaulen, for det var den siste. Då hadde eg klart alle sju, fortel han.

Jan såg reinsdyr

Jan Lunde går også i femteklasse på Austarheim skule. Han går Sauda Seven Summits-turane saman med pappa Tom Lunde. Sesongen 2021/2022 var den andre Seven Summits-sesongen hans.

– Eg vil vera med dette året som kjem også. Eg skal ta alle turane til sommaren neste år, fortel han om planen han og pappa har.

Jan og Tom fullførte sist sesong med langturen til Helgedalsnuten 13. august i år. Ein fin tur i strålande solskin.

– Eg synest den kjekkaste nuten sist sesong er Bordheia, seier Jan.

Tiåringen deltok også sesongen 2020/2021 og var då på Inste Tinden. Også det var ei spesielt kjekk oppleving.

– Då såg me reinsdyr! Og det var kjekt!

Sauda Seven Summits, 2021/2022:

Bjørnaskor – 1176 m.o.h

Skaulen – 1538 m.o.h

Røldalssåta – 1422 m.o.h

Nevroldsnuten – 1034 m.o..h

Helgedalsnuten – 1435 m.o.h

Nonskiljenuten – 1143 m.o.h

Bordheia – 1125 m.o.h

Sauda Seven Summits 2022/2023:

Himlasynsnuten – 1064 m.o.h

Skaulen – 1538 m.o.h

Søre Tinden – 1564 m.o.h

Kyrkjenuten – 1602 m.o.h

Liasetnuten – 966 m.o.h

Tengdalsnuten – 992 m.o.h

Hustveitsåta – 1187 m.o.h