Snart blir sentrum prega av song, trekkspelmusikk og – bruskasseklatring

Er du nysgjerrig på korleis årets Ryfylkequiz for 8. klassingar endar? Då bør du ta turen til Folkets Hus allereie klokka tolv på torsdag. Då skal dei beste skulelaga frå dei innleiande skulerundane gjere opp om den gjevaste plasseringa, som årets vinnarar av Ryfylkealliansens quiz. I fjor gjekk topplasseringa til Sand skule.

Konkurransar og tevlingar er populært blant dei unge, og torsdag klokka fem skal også dei yngste i Sauda få testa seg, i Barneskulanes tvekamp». Saudadagane-arrangør Sauda Ferie & Fritid lovar eit spennande opplegg, der elevane verkeleg får testa seg.

– Dette er ein konkurranse der fire elevar frå kvart trinn på kvar skule skal konkurrere i forskjellige ting. Det blir blant anna stafett, klesklypekonkurranse, tevling med rokkering, bygging av tårn og quiz. Det er elevar frå første til sjuande trinn som er med, og dette trur vi blir kjempekjekt både å sjå på og vere med på, seier Gerd Olaug Garstad i Sauda Ferie & Fritid.

Bruskasseklatring

Torsdagens store høgdepunkt for ungdommen er nok verken tvekamp eller andre kampar. Frå klokka halv åtte på kvelden er det nemleg duka for vaskeekte skumparty på Rådhusplassen. Det er sjuande til tiande trinn som er målgruppa for arrangementet, som var svært populært då det blei arrangert sist.

Saudadagane-moroa startar tidleg også på fredag. Åsne Stensvåg Seim, Vanessa-Linnea Sund Risvold og Martine Hocking er nokre av ungdommane som skal opptre på Rådhusplassen frå klokka tolv, før det blir meir musikk og underhaldning frå Nilsemann og Trekkspelklubben utover ettermiddagen.

Eit innslag som har blitt ein hit» under Saudadagane, er bruskasseklatringa som blir arrangert av Sauda klatreklubb. Også i år blir det balanse- og høgdeskrekk-bonanza, og moroa startar klokka to på Rådhusplassen.