– Treng fleire frivillige til sykkelfesten
Arrangøren trur på fleire hundre deltakarar under neste vekes sykkelfest i Sauda, og leiar i Sauda sykkelklubb, Thomas Wahl, ønsker seg endå fleire frivillige krefter.
Onsdag i neste veke går Tour of Norway for kids av stabelen i Sauda. Arrangementet er rekna som landets største sykkelritt for barn, og i løpet av 40 arrangement i by og bygd rundt om i landet, vil fleire tusen unge syklistar delta i lokale sykkelritt fram til slutten av august.
– Vi i sykkelklubben er godt førebudd, og vi gler oss veldig. Her kan alle delta, enten ein syklar på trehjulssykkel eller racersykkel. Vi har hatt arrangementet i Sauda to gonger tidlegare, og alle mellom null og tolv år kan delta, fortel leiar i Sauda sykkelklubb, Thomas Wahl.
Annonse
Han oppfordrar saudabuen til å ha ettermiddagen på onsdag i bakhovudet, spesielt om ein har planar om å opphalde seg i sentrum av Sauda på ettermiddagen.
– Det er venta mykje folk i sentrum desse timane, og for å gi dei unge syklistane best muleg plass, er det flott om så mange som muleg parkerer bilane sine utanfor sjølve sentrumskjernen, seier han.
Les meir om arrangementet her.
Wahl fortel vidare at det er eit stort apparat som er i sving når Tour of Norway for kids flyttar sitt omfattande arrangement rundt om i landet. Også Sauda sykkelklubb har jobba med førebuingar før onsdagens familiefest.
Annonse
– Sykkelklubben har førebudd dette ei stund no. Vi er no i ferd med å ta kontakt med bebuarar som blir råka av dette på nokon måte, og under sjølve arrangementet skal vi jobbe med både rigging og vakthald langs traséen. Om det er nokon som kunne tenke seg å vere med på dette, har vi behov for hjelp. Det er behov for fleire frivillige, så ta kontakt med oss, seier Wahl.
