Tusen speidarar inntar Sauda i juni

– Me trengte eit stort areal der det er plass til mange speidartelt. Samtidig ønska me å legga leiren til ein stad der deltakarane kan oppleva mange kjekke aktivitetar, og der folk og kommune er greie å samarbeida med. Då blei det Sauda, seier Jan Egil Midtskog, teknisk ansvarleg for den store speidarleiren som skal arrangerast i Sauda i juni 2023.

Vil verkeleg til Sauda

Det er speidarkrinsane Hordaland, Ryvarden, Sogn og Fjordane og Bjørgvin som har valt å legga 2023-landsleiren sin, Jakten», til Sauda. Leiren, som er for barn frå tredje til tiande klasse, startar fredag 24. juni og varer til og med laurdag 1. juli. Dei yngste, barn i 3. til 6. klasse, får ei halv veke på leir, dei eldste, 7. til 10. klasse, får ei heil veke. Det er tenkt at leiren skal etablerast på Birkeland.

Ideen om å legga landsleiren til Sauda blei først lansert for fire år sidan, etter innspel frå ein fornøgd hytteeigar i Sauda. Den gong fall valet på Eidfjord, men Sauda-forslaget blei henta fram igjen nå i 2022. Heilt sidan før sommaren i år har det blitt jobba med planlegginga.

– Nå i haust blei det inngått avtalar med grunneigarane. Det var veldig bra, for me hadde ingen Plan B. Me vil verkeleg til Sauda, seier Midtskog, som rosar all den gode mottakinga dei har fått i Sauda.

Mat til tusen

I Sauda er det fleire som nå jobbar med å førebu seg på storinnrykket av dei rundt tusen unge speidarane i juni neste år. Sauda Ferie & Fritid er involvert i planlegginga.

– Me har deltatt i fleire møte, saman med blant andre kommunen, grunneigarar og arrangøren. Det er mykje som må organiserast i samband med eit så stort arrangement, både med tanke på oppbygginga av leiren og på matforsyningar til alle deltakarane. Her må jo alle matbutikkane i Sauda involverast. Me jobbar også med å laga til forslag til kva deltakarane kan besøka og oppleva medan dei er i Sauda, seier Ragnar Fosstveit, dagleg leiar i Sauda Ferie & Fritid.

Treng fleire tusen stokkar og ved

På Birkeland er grunneigarane Sverre Gustav Birkeland og Ola Magnar Birkeland positive til leirplanane, og stiller gjerne areal til disposisjon for speidarane.

– Me har 40 mål til disposisjon. Me meiner denne landsleiren er eit godt prosjekt for Sauda, seier Sverre Gustav Birkeland.

Ifølge teknisk ansvarleg for leiren, Jan Egil Midtskog, kunne dei også klart seg med litt mindre enn 40 mål.

– Men av sikkerheitsmessige grunnar er det bra å ha eit såpass stort areal. Både med tanke på avstand frå bilvegen og brannsikkerheit, seier han.

Grunneigarane vil også bidra med å skaffa materiale til sjølve leirbygginga. Arrangøren har blant anna bedt om tilgang på eit par tusen fem-seks meter lange tømmerstokkar.

– Eg har sagt at eg kan hjelpa til med å skaffa dette tømmeret. Ikkje nødvendigvis frå min skog. Om det blir tømmer frå bare Sauda eller også andre stader, er ikkje avklart ennå, seier Sverre Gustav Birkeland.

Ifølge Midskog trengs tømmeret til portalar og ulike byggverk inne i leiren.

– Me vil også trenga masse ved, legg han til.

Den planlagde leirplassen ligg på jordbruksareal like ved Sauda vidaregåande skule sitt bygg på Birkeland. Det er tenkt at leirarrangørane og -deltakarane skal kunna bruka skulen sine fasilitetar. Her ser Midtskog føre seg at det blir rigga til ein kafé, ein speidarbutikk, pluss kontor for administrasjonen.

Rektor Bård Lien seier at skulen så klart er positiv til eit samarbeid.

– Me stiller oss positive til å bidra så godt me kan, og vil gjera det me kan for å tilpassa den vanlege drifta vår til ønska deira. Me ventar på meir informasjon frå arrangøren, seier Lien.

Vil bli synlege

Arrangøren opnar for påmelding like over nyttår. Ifølge Midtskog ventar dei over tusen deltakarar.

– Dei aller fleste frå vår region, men truleg kjem det også nokre frå Austlandet, sidan me har ein så stor og bra leir, seier han.

I løpet av den vekelange leiren i Sauda vil deltakarane følga eit program, der det er lagt opp til to daglege økter.

– Me vil visa godt igjen i bybildet og elles i Sauda, sjølv om basen vår er på Birkeland. Eg tippar at badeanlegget vil bli godt besøkt! Elles skal deltakarane ut på haik», altså klara seg ute eit heilt døgn, med mat og utstyr dei sjølv meiner at dei treng. Ei spennande oppgåve for dei, seier Midtskog.

Namnet på speidarleiren er Jakten».

– Ein kan legga kva ein vil i det. Jakta på gode opplevingar, jakta på vennskap, jakta på kjærleiken eller andre ting, seier Midtskog.