Veka som gjekk (utanfor Sandeid)

Ulempene havnar som regel ikkje på mitt eige bord, men heller hos dei som må leve med meg. Eg hugsar for eksempel lett å etterfylle spylevæske på bilen, men slit med meir kvardagslege ting som å lade telefon, slå av lys og lukke dører.

Eg har for eksempel opplevd å gå på butikken for å handle brød. Eg fekk beskjed om også å hugse yoghurt, smør og frukt. På veg ut av butikken var eg storfornøgd med meg sjølv, som helt på eigenhand hugsa at vi også trengte oppvasktablettar. Det var ikkje før eg kom heim at det blei oppdaga at eg hadde gløymt brød. Frukta var også blitt forveksla med mjølkesjokolade. Dette er dessverre ikkje uvanleg.

Eg er ein av dei som går ned i kjellaren for å hente noko, og blir ståande der nede å stirre i lufta, utan å hugse kvifor eg gjekk ned. Eg har inga problem med å hugse kvar einaste låt på Beatles sitt White Album. Eg hugsar oppskrifta på Dronning Maud-fromasj, eg hugsar kven som scora vinnarmålet i finalen i VM i fotball i 1986, og eg hugsar bursdagane til nesten alle eg gjekk i første klasse saman med. Det er 34 år sidan. I skrivande stund kan eg ikkje hugse kva eg åt til middag i går.

Min betre halvdel hevdar at eg fint klarar å hugse alt som gagnar meg sjølv, at det handlar om vilje og ikkje noko anna. Ho har nok eit poeng. Eg elskar jo trass alt både Beatles, Dronning Maud-fromasj og fotball. Kanskje eg rett og slett må skjerpe meg, og lage meg eit betre system. Eg tar det når eg kjem heim, om eg hugsar det.

Eg har i alle fall hugsa å lese litt nyheiter, og her er eit par frå veka som gjekk.

• Fotballspelaren Martin Ødegaard fekk denne veka sine første speleminutt i Premier League, då Arsenal og Manchester United spelte uavgjort laurdag. Under kampen let TV2 sjåarane stemme fram banens beste spelar, og i det 79´minutt av kampen leia nordmannen avstemminga med god margin. Dette på trass av at han ikkje fekk spele før i det 84´minutt. Nordmenn er seg sjølv lik.
• Realitykjendisen Kim Kardashian og ektemannen Kanye West blei i 2016 rana i si leilighet i Paris, og denne veka var det klart at det blir bok av hendinga. Ein smule overraskande er det at det ikkje er kjendisane sjølv, men ein av ranarane som har ført hendinga i pennen. Blant anna skal det kome fram i boka at kjendisane forsøkte å ringe naudnummeret då ranet blei gjennomført. Problemet var bare at dei ringte 911. Det funka dårleg i Paris.
• Avisa Samningen skriv denne veka om eit sju-åtte meter stort hol i isen på Skarsvatnet i Samnanger. ”Kan holet i isen vere laga av ein ufo?” spør avisa, etter at ein ufo-entusiast tok kontakt. Ein professor i oseanografi ved Universitetet i Bergen svarar imponerande høflig at han ”trur at fenomenet kan ha ei anna forklaring”.
• Tittelen ”Lensmann” skal fasast ut, til fordel for ein kjønnsnøytral variant. Lensmann-tittelen har eksistert i Norge sidan 1200-talet, og om målet er å jamne ut kjønnsbegrepet, så kan vi kanskje heller starte med å arbeide for ein rettferdig lønnsfordeling for nordmenn av begge kjønn? Eller, nord-personar, blir det vel.
• Avisa Varden skreiv denne veka om ein mann som blei lettare skada då kameraten tende på eit stjerneskot i trusa hans. Mannen skildra hendinga som ”utruleg vondt”. Vedkommande står ikkje fram med namn eller billete, og det har eg den største forståing for.