Veka som gjekk (utanfor Sandeid)

Halloween har i moderne tid vore ei markering av slutten på sommaren og starten på vinteren. At sommarens slutt blir markert med ondskapsfulle utkledningar, død, pine og styggedom, er sjølvsagt heilt logisk. Ingen friske, oppegåande menneske gler seg vel til sommaren er over? Nei, det seier seg sjølv at lange sommarkveldar på terrassen, strandkos og solskin ikkje på nokon måte kan erstattast av snømåking, slapseføre og våte sko. Dermed er det forståeleg at denne overgangen er sett i samanheng med redsle, mørke og svarte klede.

For all del. Vinteren hadde vore heilt fin, hadde det ikkje vore for at den er mørkare, kaldare, våtare, tristare og ikkje minst lengre enn sommaren. Når snøgrensa kryp faretruande langt nedover fjellsidene, er det alltid nokre friskusar som skal markere seg i sosiale medier. ”Endelig kjem vinteren”, skriv dei gjerne. Eller ”No kjem snøen”, med smile-emojiar og entusiastiske undertonar. Deretter kjem kommentarane frå vener og kjente. Dei trur gjerne at dersom dei ”likar” desse innlegga, så framstår også dei som ”sunne”, sporty vintermenneske. Det er ikkje sporty. Det er slag på slag under beltestaden for oss som ikkje bruker Swix som deodorant, som ikkje har eigd ein fjellanorakk med stor lomme sidan barndomen, og som meiner at ullundertøy ikkje kan reknast som kvardagstøy.

I april, når vinteren omsider er overstått, står eg og mange andre igjen som blodfattige, likbleike zombiar med livlause auge og ryggar som er krokbøyd etter all snømåkinga. Det var då vi skulle ha feira Halloween.

Ein frys som regel ikkje når ein les nyheiter, og her er eit par saker som eg fann oppmuntring i dei siste dagane:

* VG fortel denne veka om 50-åringen Adrian frå Australia, som fann ein edderkopp som likna på Elton John. Det er ikkje opplyst om Adrian kverka litle ”Elton”, men om han gjorde det, var det nok vanskeleg å seie ”Sorry” etterpå.

* Artisten Kygo har kjøpt eit digitalt bilde av ei ape for meir enn ein million kroner. Det varmar verkeleg å sjå at han har klart å kome seg litt på beina etter det tøffe og krevande koronaåret.

* Basketballspelaren Kyrie Irving har tidlegare stått fram som koronavaksinemotstandar. 29-åringen har vakt oppsikt i USA med sine haldningar til vaksineringa, men denne veka falt alle bitane på plass, då Irving også slo fast at jorda er flat, at månelandinga i 1969 aldri fann stad, samt at dinosaurane aldri har levd.

* Førre veke skreiv eg om ei nyheit frå Finland, der det endeleg var minken sin tur å få koronavaksine. Denne veka kom det trasige nyheiter frå Denver, USA. Der har nemleg elleve løver testa positivt for korona, etter observasjonar av hoste og nysing blant dyra. Dei tilsette opplyser at dei vil halde auge med dyra dei kommande dagane, og det er førebels ikkje snakk om å innføre munnbindpåbod eller avstandskrav i løveburet. Eg tenker at løver er sterke dyr, så det er sikkert nok å ta ein halv parasitt og halde seg litt i ro.

* VG satsar vidare på sin humor-realitysuksess ”Ikke lov å le på hytta”, der kjendisar konkurrerer i å la vere å le av kvarandres påfunn. Eg såg ein episode, og konstaterer at eg hadde gjort det skarpt i konkurransen.