Veka som gjekk (utanfor Sandeid)

Vi har sett det før. Støre snakkar usamanhengande om velferd og omsynslaus privatisering av helsevesenet. Solberg lovar endå hardare behandling av mottakarar av sosialhjelp. Vedum vil børste støv av gløymte politistasjonar. Listhaug er livredd for at krigsofre frå Afghanistan skal hamne føre ho i køa på Meny, medan Lysbakken framleis har postadresse i Sherwoodskogen.

Lite er nytt i haustens stortings- og sametingsval, og medan landet er i ferd med å få kjensla tilbake i overarmen etter to stikk, går det no mot nye veker med partileiardebattar, nye rundar med løfter om tilskot, rettferd og betre tider. Alle partia har løysinga på alle problem, og alle er like oppriktig bekymra for kva som skjer med fedrelandet, om motstandarane skulle kome til makta. Slikt blir det sjølvsagt god underhaldning av.

Nokre utspel og formuleringar frå politikarane er gjerne nye, men mange har vi høyrt før. Til eksempel ”No går du altså mot eit forslag som ditt eige parti var med å støtte då de var i regjering” eller klassikaren ”Det er veldig gledeleg at ditt parti endeleg meiner det vi har sagt heile tida.”

Så, ei lita veke før valet, blir eit par av partileiarane konfrontert med dårlege prognosar. Svaret er det same som alltid: ”Det er framleis lenge igjen til valdagen, så det tenker vi ikkje så mykje på. Det kan endre seg til då.” Det gjer det ikkje.

Vi har framleis nokre veker føre oss med dette sirkuset, og ein må vere flinke til å lese mellom linjene om ein skal klare å finne heil ved i virvaret av tal, diskusjonar, løfter og påstandar som blir kasta rundt i valkampen. Kven som står igjen på slottsplassen med magen full av kamelar, det gjenstår å sjå.

Ute i den store verda, heilt utanfor Sandeid, der har det skjedd ting. Her er eit par eksempel som eg la merke til i veka som gjekk:

* Avisa Dølen har denne veka følgande overskrift: ”Lars (24) meldte seg på populært TV-program av kjedsomhet. Fire uker senere satt han fyllesyk og redusert i studio”. Artikkelen var bak betalingsmur, så eg fekk ikkje lest heile. Det er muleg eg tar feil, men la ikkje TV2 ned ”Gutta på tur” for fleire år sidan?

* Avisa Fremover leverer både små og store nyheiter frå nordlege strok, og det er tydelegvis ingen spøk å skaffe seg føde oppe i nord. Avisa leverer nemleg denne overskrifta: ”Anne (15) skulle bare ha pommes frites. Endte opp med biffsnadder og sjikane”.

* Dei fleste hugsar nok coveret på det legendariske Nirvana-albumet ”Nevermind”, der ein babygut under vatn har blikket festa på ein dollarsedel som er festa på ein fiskekrok. No er babyen vaksen, og har saksøkt dei gjenlevande medlemma i bandet, blant anna fordi private kroppsdelar var vist på coveret. Endå meir imponerande var søksmålet som ein annan amerikanar retta mot baren La Fogata Mexican Grill i Texas. Mannen blei nyleg tilkjend omlag 49 millionar kroner i erstatning, fordi han blei full. Ja, det stemmer. Fordi han blei full.

* Youtuber Dennis Vareide snakkar denne veka ut om dramaet som utspant seg for få veker sidan, i forkant av at 31-åringen skulle delta i premieren på tv-programmet ”Skal vi danse”. Ulukka som skjedde, viser at sjølv eit augeblikks uoppmerksamheit kan snu eit liv på hovudet. Vareide fortel sjølv at han hadde klipt tåneglane, då han innsåg at han hadde klipt litt for mykje på eine stortåa. Resultatet blei at negla grodde inn i huda, og forårsaka både frykt og smerter. Både TV2 og seher.no opplyser no at Vareide er i ferd med å kome seg etter hendinga. Norge held pusten.

* Framstegspartiets Ungdom tirra på seg mellom anna Noregs mållag, då dei førre veke stilte opp på skuledebattar med ein plakat som forestilte Ivar Aasen, med påskrifta ”F..k nynorsk”. Eg synest ikkje mållaget treng å uroe seg særleg, for dersom oppropet ”F..k nynorsk” beviser noko, er det vel at ungdom framleis treng grundig språkopplæring i skulen.