Veka som gjekk (utanfor Sandeid)

For all del. Bergen har mykje å by på. Brustein, breiflabb, bompengar og einvegskøyrte gater så langt auga kan sjå. Kø på vegen. Kø i butikken. Kø for å trekke kølapp. Ein skal legge meir enn godvilje til for å lengte etter slikt.

Eg merkar det kvar gong eg er i Bergen. Spesielt når eg kjem frå sør og husa begynner å stå tettare på Fjøsangervegen, for det er då sjølve velkomsten openbarar seg. Eit mektig byggverk av stål reiser seg i horisonten, eit monument av rammeverk, leidningar og kameralinser som alle peiker mot nettopp deg.

Bodskapa er like tydelege som dei er innbydande. ”Velkomen til Bergen. No har du kome så langt at det er for seint å snu. Bompengane er allereie trekt frå konto, og ja, det er rushtidsavgift sjølv om det er ferie. Skal du parkere, så anbefalar vi å kontakte banken for forbrukslån. Køyrer du med piggdekk må du pårekne ekstra gebyr, og hugs at om du på noko tidspunkt forlet sentrumskjerna, må du betale på nytt om du skal inn igjen. Ha eit fint opphald.”

Det er annleis å kome tilbake til Sauda. Eg kjenner det best når eg kjem ut frå den siste tunnelen på veg heim. Sjøen ligg spegelblank på høgre side og det einaste bodskapet eg kjenner er ”Velkomen heim. No skal du få ro.”

Før eg køyrer av stad mot alle avgifters moderby, vil eg nemne eit par nyheiter frå resten av verda.

* Det viktigaste først. Dagbladet røper denne veka oppsiktsvekkande detaljer om den folkekjære NRK-profilen Karen Marie Ellefsen, som nyleg pensjonerte seg frå tv-ruta. Avisa har intervjua Ellefsen, og kan blant anna fortelle at ho synest det er rart å ikkje jobbe. Om det ikkje er nok, opplyser avisa vidare at ho denne veka har vore på bowling.

* Seher.no skriv denne veka at prinsesse Märtha Louise er plaga av ustabile menn som luskar rundt eigedomen hennar i Lommedalen. No er det på tide at nokon tar tak og får ein slutt på denne galskapen. Er det plutseleg ikkje greitt om ein stakkar vil kose seg litt i norsk utmark på kveldstid med telelinse, kikkert og loggbok?

* Regjeringa vil blokkere utanlandske nettstader som tilbyr pengespel, melder avisa E24. Korleis tenker då regjeringa at eg skal vinne matpengar til ungane i framtida? Dei er jo heilt uskuldige oppi alt dette.

* For ein gong skuld vil eg også ta med eit innslag frå ei papiravis i ein av våre nærliggande kommunar. Der står nemleg ein annonse på trykk, med stor, kvit skrift mot rosa bakgrunn. ”Singeldag” er overskrifta, og det er ikkje til å misforstå. Eller er det det? Jo, det viser seg at den litle skrifta i annonsen forklarer at ”singeldag”, er ein dag for gratis utlevering av småstein, også kalla singel, til bruk på gravstader. Stavanger kirkelige fellesråd ønsker velkomen.

* Måndag denne veka førte eit massivt børsfall i verda til at klodens 500 rikaste personar tapte over 1100 milliardar kroner. Eg visste at eg ein dag skulle tene meir enn Elon Musk. Den dagen var altså på måndag.