Veka som gjekk (utanfor Sandeid)

Eg har djup respekt for det tolmodet de er nøydd til å ha kvar einaste dag på jobb. Eg har sjølv jobba i butikk, og det er ikkje reint få gonger eg har hatt lyst å fortelle kundar mi oppriktige meining, enten i form av ein verbal hårfønar eller ein velplassert fot der låra blir kjent med kvarandre.

Det er ikkje alltid like enkelt å halde maska, for det er ikkje reint lite ein butikktilsett er nøydd til å finne seg i frå enkelte kundar. Tolmod, forståing og normal folkeskikk er nemleg lett å gløyme for småstressa kundar som ikkje har planlagt godt nok. Og nettopp dei blir det mange av i vekene som kjem, for no tar nemleg julehandelen til for fullt. Til dei som skal i gang med gåvehandlinga, vil eg i all beskjedenheit kome med eit par forslag som kan gjere opplevinga betre for både de og dei butikktilsette.

Klag heller over vêret eller bensinprisane.

Eg vil først råde dykk til å gi dei juletilsette i butikkane fred. Mange av dei har sin aller første jobb, og som oftast har dei ikkje fått tid til å sette seg inn i alle spesifikasjonar og detaljar som de forventar svar på. Dei er der for å hjelpe så godt dei kan, og fortener støtte i staden for surmuling. Klag heller over vêret eller bensinprisane. Det er nok av ting å hisse seg opp over.

Mange butikkar seier nei til å pakke inn varer i gåvepapir i vekene før jul. Årsaka til det er at dei vil hjelpe flest muleg kundar, slik at butikken får selt mest muleg utan at folk må stå i kø og vente. Mange lokale butikkar er avhengige av eit godt sal til jul for at budsjetta skal gå opp, og det er mykje viktigare enn at du skal sleppe å pakke inn dine eigne gåver.

Sist men ikkje minst: Om ein vare manglar prislapp, ver så snill å spare dei tilsette for den klassiske ”Då må han jo vere gratis, då”. Denne vitsen er verken ny eller morosam, og burde ha vore obligatorisk straffa med 24 timars tvangssjåing av ”Karl & co”.

Sidan eg heller ikkje i år blei kontakta av People Magazine sin ”Årets mest sexy mann”-jury, har eg hatt god tid til å lese litt nyheiter. Her er eit par av dei:

* Dagbladet publiserte denne veka ein videosnutt av den tidligare fotballstjerna Ronaldinho, som skriv ein autograf på brystpartiet av t-skjorta til ein kvinneleg fan. Dette er sjølvsagt ikkje noko ein lesar med vettet i behald vil bruke to minutt av livet på, så avisa gjer i kjent stil eit heilhjerta forsøk på å lure lesarane inn for å sjå videoen. Det gjer dei med overskrifta ”Nettet koker etter puppestunt”. Dei er kreative i Dagbladet, det skal dei ha.

* Finnmarksposten melder at lokale smitteverntiltak er iverksett etter auke i smitten i Nordkapp kommune. No er det ikkje lov å ha meir enn fem besøkande i heimen. Siste gong meir enn to personar vart observert i same bustad var forøvrig ein vårdag i 1982, og då var det nokon som hadde køyrt feil.

* Nyheitsbyrået NTB melder onsdag ettermiddag at det er forsinkingar i togtrafikken til Oslo, på grunn av ein papegøye som har tatt seg inn i eit elektrisk anlegg. Sabotøren blei etter alt å døme lokka ut med kjeks.

* Statsminister Jonas Gahr Støre får hard medfart i avisa Nordhordland denne veka. Bakgrunnen er at Støre før valet lova seksåringen Milla-Sofie gratis briller når han kom i regjering. Dette blei som kjent ikkje tatt med i statsbudsjettet, men eg synest det blir feil å gi Støre skylda for at Mille-Sofie ikkje greidde å lese det som sto med lita skrift.

* New York Times har kartlagt kva delar av USA som har størst risiko for dødsfall grunna koronasjukdom, og konkluderer at dei Trump-vennlege statane har tre gonger høgare risiko enn statane med høgast andel tilhengarar av Joe Biden. Eg er sjølvsagt ikkje heilt ukritisk til desse tala, og er spent på kva som kjem fram når Donald Trump sjølv legg fram den eigentlege fasiten.